Azərbaycan Kapital Bazarları Assosiasiyası (AKBA) “Mikromaliyyədə investisiya və dayanıqlı inkişaf” mövzusunda keçirilən XII AMFA Konfransında tərəfdaş qismində iştirak edib.

Azərbaycan Mikromaliyyə Assosiasiyasının (AMFA) təşkilatçılığı ilə keçirilən konfrans çərçivəsində AKBA Direktorlar Şurasının sədri Orxan Bağırovun moderatorluğu ilə “Maliyyəyə çıxış imkanları: investorların və sığorta şirkətlərinin rolu” mövzusunda panel müzakirəsi baş tutub.

Paneldə yerli və beynəlxalq maliyyə sektorunun nümayəndələri bir araya gələrək maliyyə resurslarına çıxış imkanlarının genişləndirilməsi, alternativ maliyyələşmə mexanizmlərinin inkişafı və investorların bu prosesdə rolu ətrafında fikir mübadiləsi aparıblar. Müzakirələr zamanı kapital bazarlarının mikromaliyyə sektoru üçün alternativ maliyyələşmə mənbəyi kimi əhəmiyyəti, investisiya imkanlarının genişləndirilməsi və sığorta mexanizmlərinin maliyyə əlçatanlığının artırılmasındakı rolu diqqət mərkəzində olub.

Panel müzakirəsində AKBA-nın üzvü olan “PAŞA Kapital İnvestisiya Şirkəti”nin baş icraçı direktoru İsi Mustafayev, Azərbaycan Sığortaçılar Assosiasiyasının (ASA) icraçı direktoru Abas Miskərli, Mikromaliyyə Mərkəzinin (MFC) İnkişaf Maliyyəsi üzrə eksperti Pyotr Korinski, Development Guarantee Group-un portfel meneceri Alberto Didoni, NUQI Digital Wealth-in icraçı direktoru və Maliyyə institutları üzrə qlobal rəhbəri Asif Hüseyn iştirak ediblər.

Tədbir çərçivəsində, həmçinin bütün tərəfdaş maliyyə assosiasiyaları adından AMFA-nın 25 illik yubileyi münasibətilə xatirə hədiyyəsi təqdim olunub.

AKBA konfransın təşkilinə və göstərilən qonaqpərvərliyə görə AMFA rəhbərliyinə və kollektivinə təşəkkür edir, Assosiasiyanı 25 illik yubileyi münasibətilə bir daha təbrik edir və gələcək fəaliyyətində uğurlar arzulayır.