Mühasibat, sığorta və risk sahəsi çox dəqiqlik tələb edir. Bu qədər strukturlaşdırılmış bir sahədə yaradıcılığa yer varmı?

Bəli, mütləq var. Yaradıcılıq burada rəqəmləri dəyişmək deyil, onları fərqli bucaqlardan analiz etmək, riskləri öncədən görmək və innovativ həll yolları tapmaqdır. Hər dəqiqlik yaradıcılığın üzərində qurulur.

Komandanızla işləyərkən nəyə daha çox diqqət edirsiniz - nəticəyə, yoxsa prosesə?

Prosesə. Çünki sağlam və şəffaf proses olmasa, nəticə də dayanıqlı olmaz. Amma ideal vəziyyətdə hər ikisi bir-birini tamamlamalıdır.

Qadın lider kimi bu sahədə ən çox qürur duyduğunuz uğur hansıdır?

Qadınların bu sahədə daha çox görünməsinə və qərar verən mövqelərdə olmasına töhfə verməyim. Komandamda qadınların peşəkarlıqla liderliyə yüksəlməsi mənim üçün ən böyük uğurdur. Hal-hazırda həmin xanımlar yüksək vəzifələrdə çalışırlar və bu mənim üçün həm uğur, həm də qürur vericidir.

Süni intellekt və rəqəmsal texnologiyalar mühasibat və audit sahəsində insan faktorunu azaldır, yoxsa gücləndirir?

Gücləndirir. Texnologiya əməliyyatları sadələşdirir, amma etik qərar, analitik düşüncə və məsuliyyət hissi hələ də insanın əlindədir.

Ən qiymətli səhv - hər şeyi dərhal mükəmməl etməyə çalışmaqdır. Bu sahələrdə təcrübə zamanla formalaşır. Gənclər çox vaxt səhv etməkdən qorxurlar, halbuki səhv öyrənmənin ən real hissəsidir. Əsas odur ki, həmin səhvi görüb, analiz edib, növbəti addımda daha düzgün qərar verə biləsən. Dəqiqlik təcrübədən doğur, təcrübə isə səhvlərdən.

Gənclər üçün bu sahəni daha cazibədar etmək üçün hansı bir yenilik tətbiq edərdiniz?

Rəqəmsal təlim platformaları və real biznes simulyasiyaları. Gənclər üçün bu sahəni daha cazibədar etmək üçün rəqəmsal və interaktiv öyrənmə mühitləri yaradardım. Məsələn, real biznes simulyasiyaları, süni intellektlə işləyən analiz platformaları və oyunlaşdırılmış təlim proqramları. Bu, həm praktiki təcrübəni artırar, həm də mühasibat və risk sahəsini daha dinamik və motivasiyaedici hala gətirər. Gənclər nəzəriyyədən çox praktik təcrübə ilə motivasiya olurlar.

Həyatda məni ən çox dəyişdirən hadisə - sağlamlıqla bağlı yaşadığım sınaq olub. O dövr mənə həm öz gücümü, həm də həyatın dəyərini öyrətdi. Hər şeyin ölçüsünü dəyişdirdi: prioritetlərim, baxış bucağım, insanlara və həyata münasibətim tam fərqli oldu. İndi hər günü dəyərli yaşamağa çalışıram, çünki bilirəm - heç nə təxirə salınmamalıdır.

Boş vaxtlarınızda beyninizi və ruhunuzu necə “yeniləyirsiniz”?

Içəri Şəhərdə gəzməklə, övladımla vaxt keçirməklə, kitab oxumaqla və musiqi dinləməklə. Həyatın ritmini dinləmək bəzən ən yaxşı terapiyadır.