Bakı Fond Birjasının əsas bazar listinq seqmentində ticarət olunan “PAŞA Bank” ASC (PSHBK) 2025-ci ilin nəticələri üzrə elan olunmuş 107 043 000 AZN dividendin ikinci hissəsini ödəyir. Səhmdarlara 53 521 500 AZN köçürüləcək. Bu, bir səhm üzrə təxminən 2,86 AZN deməkdir. Dividendlərin birinci hissəsi səhmdarlara 9-10 iyul 2026-cı il tarixlərində ödənilmişdi.

Əsas tarixlər:

27 oktyabr, saat 16:30: dividend hüququ ilə səhm almaq üçün son ticarət günü

28 oktyabr, saat 18:00: Reyester tarixi. Bu tarixdə MDM-in apardığı səhmdarlar reyestrində adları qeyd olunan şəxslər dividend almaq hüququna malikdir

30 oktyabr: ödəniş tarixi

Hazırda birjada ($PSHBK) səhminin istinad qiyməti 54,41 manatdır. Cari qiymətlə bazar kapitallaşması təxminən 1.02 milyard manat təşkil edir. 

Ödənilən illik dividend məbləği (5.72 AZN) İlkin Kütləvi Təklif qiymətinə nəzərən (55 AZN) illik 10.4% dividend gəlirliliyi deməkdir. Səhmin birjada ticarət qiyməti İyul – Oktyabr ayları üzrə İKT qiymətindən aşağı olduğundan, bu göstərici 10.8%-ədək yüksəlir. Bu isə təkrar bazarda yeni alıcılar üçün əlavə cəlbedicilik yaradır. 

Qeyd edək ki, İlkin Kütləvi Təklifdən sonra bankın səhmdarlarının sayı 18 minə yaxınlaşıb. Fiziki şəxslər üçün dividend vergidən azaddır və tam həcmdə investorların bank hesablarına köçürüləcəkdir.

Bu xəbər məlumat xarakterlidir, investisiya tövsiyəsi deyil.