Mərkəzi Bankın sədri Taleh Kazımov Türkiyədə təşkil olunan “İstanbul İqtisadi Forumu”nda iştirak edib.

Taleh Kazımov forum çərçivəsində “Qeyri-müəyyənlik şəraitində pul siyasəti” mövzusunda keçirilən panel müzakirəsində çıxış edib. O, qlobal iqtisadiyyatda artan qeyri-müəyyənliklər və geosiyasi risklərin Azərbaycan iqtisadiyyatına, eləcə də həyata keçirilən pul siyasətinə təsirləri barədə fikirlərini bölüşüb.

Taleh Kazımov belə bir şəraitdə qiymət və makroiqtisadi sabitliyin qorunmasının, inflyasiya gözləntilərinin effektiv idarə edilməsinin, çevik qərarvermənin, həmçinin mərkəzi bankların şəffaf və effektiv kommunikasiyasının əhəmiyyətini vurğulayıb

Sədr qlobal çağırışlarla səciyyələnən dəyişkən mühitdə dayanıqlılıq və institusional etibarlılığın xüsusi əhəmiyyət daşıdığını qeyd edib. O, həmçinin mərkəzi banklar arasında beynəlxalq dialoqun gücləndirilməsinin vacibliyini vurğulayaraq, forumun bu istiqamətdə mühüm platforma olduğunu bildirib.

Qeyd edək ki, Türkiyə Mərkəzi Bankı tərəfindən təşkil olunan və iki gün davam edən “İstanbul İqtisadi Forumu” müxtəlif ölkələrin mərkəzi banklarının və beynəlxalq maliyyə institutlarının rəhbərlərini bir araya gətirib. Qlobal iqtisadi perspektivlər, pul siyasəti, maliyyə sabitliyi, süni intellektin iqtisadiyyata təsirləri və beynəlxalq ticarətdə mövcud çağırışlar forumun əsas müzakirə mövzuları olub.