Bakıda dünyanın aparıcı investorlarının, dövlət və beynəlxalq maliyyə institutlarının nümayəndələrinin, eləcə də biznes liderlərinin iştirakı ilə İkinci Beynəlxalq İnvestisiya Forumu keçirilir.

Mərkəzi Bankın sədri Taleh Kazımov və maliyyə naziri Sahil Babayev forum çərçivəsində keçirilən “Beynəlxalq maliyyə sahəsində əməkdaşlıq: inkişaf naminə tərəfdaşlıqların qurulması” sessiyasının “Qlobal maliyyə perspektivləri və regional təsirlər” mövzusuna həsr olunan tədbirdə çıxış ediblər.

Taleh Kazımov qeyri-müəyyənliklər şəraitində tənzimləyici qurumların fəaliyyətlərində daha çevik və məlumatlara əsaslanan yanaşmaların zəruriliyindən danışıb. O, Orta Dəhlizdə strateji mövqeyə malik nəqliyyat və logistika qovşağı olan Azərbaycanın daha şaxələndirilmiş iqtisadi inkişaf trayektoriyasının formalaşdırılmasında xarici investisiyaların xüsusi əhəmiyyət daşıdığını vurğulayıb, ölkəmizin güclü makroiqtisadi göstəriciləri, maliyyə sabitliyi və beynəlxalq reytinqlərinin investorların etimadı üçün mühüm təməl formalaşdırdığını qeyd edib.

Daha sonra tədbir beynəlxalq təşkilatların və yerli maliyyə institutlarının nümayəndələrinin iştirak etdiyi müzakirə paneli ilə davam edib. Bu zaman beynəlxalq kapitalın infrastruktur, sənaye və regional bağlantı layihələrinə yönəldilməsi, çoxtərəfli inkişaf bankları, özəl investorlar və maliyyə institutları arasında tərəfdaşlığın genişləndirilməsi məsələləri müzakirə olunub. Əlavə olaraq kredit reytinqləri və bazara dair məlumatlarının investor etimadının formalaşmasındakı rolu ətrafında fikir mübadiləsi aparılıb.

Qeyd edək ki, İkinci Azərbaycan Beynəlxalq İnvestisiya Forumu yeni tərəfdaşlıqların qurulması, investisiyaların cəlb edilməsi və iqtisadi imkanların genişləndirilməsi baxımından mühüm beynəlxalq platforma kimi çıxış edir.