Mərkəzi Gömrük Hospitalında “Fetal təbabət üzrə master-klass” mövzusunda master-klass keçirilib
18 sentyabr 2026-cı il tarixində Mərkəzi Gömrük Hospitalında Dövlət Gömrük Komitəsinin Tibbi Xidmət İdarəsinin, Mərkəzi Gömrük Hospitalının, Elmi Təcrübi və Tədris Mərkəzinin və Britaniya-Azərbaycan Həkimləri və Stomatoloqları Assosiasiyasının təşkilatçılığı ilə “Fetal təbabət üzrə master-klass” mövzusunda tədbir keçirilib.
Tədbirdə Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini t.ü.f.d. İsmayıl Əfəndiyev, Mərkəzi Gömrük Hospitalının rəis müavini Nahidə Mahmudova, Britaniya-Azərbaycan Həkim və Stomatoloqlar Assosiasiyasının rəhbəri, Böyük Britaniyanın Birmingem Qadın və Uşaq Hospitalının mama-ginekoloqu, t.ü.f.d. Fidan İsrafil-Bəyli, Böyük Britaniyanın Mamalıq, Ginekologiya və Fetal Təbabət üzrə professoru Mark Kilbi mama-ginekoloqlar, radioloqlar və həkim-rezidentlər iştirak ediblər.
Tədbirdə Dövlət Gömrük Komitəsi Tibbi Xidmət İdarəsinin rəis müavini İsmayıl Əfəndiyev salamlama nitqi ilə çıxış edərək fetal təbabətin müasir mamalıq və ginekologiyanın mühüm istiqamətlərindən biri olduğunu, ana və döl sağlamlığının qorunması, dölün inkişafında mümkün problemlərin erkən mərhələdə aşkarlanması və müasir diaqnostik yanaşmaların tətbiqinin əhəmiyyətindən danışıb.
Rəis müavini İsmayıl Əfəndiyev bildirib ki, fetal təbabət üzrə master-klassın keçirilməsi mütəxəssislər arasında təcrübə mübadiləsinin genişləndirilməsinə, bu sahədə peşəkar biliklərin artırılmasına, eyni zamanda beynəlxalq təcrübənin öyrənilməsinə və qabaqcıl metodların yerli tibbi praktikaya inteqrasiyasına mühüm töhfə verir.
Böyük Britaniyanın Birmingem Qadın və uşaq hospitalının mama-ginekoloqu Fidan İsrafil-Bəylinin moderatorluğu ilə keçirilən master-klassda Böyük Britaniyanın Mamalıq, Ginekologiya və Fetal Təbabət üzrə professoru Mark Kilbi “USM tapıntılarından klinik qərara doğru: Mürəkkəb fetal hallar” mövzusunda çıxış edib. Master-klassda mürəkkəb fetal hallar, ultrasəs müayinəsi əsasında klinik qərarların qəbulu, dölün ana bətnində müalicəsi və cərrahi müdaxilələr müzakirə olunub. Tədbir zamanı real klinik hallar təqdim edilib və interaktiv müzakirələr aparılıb.
Qeyd edək ki, fetal təbabət sahəsində beynəlxalq təcrübənin öyrənilməsi və müasir tibbi yanaşmaların tətbiqi ana və döl sağlamlığının qorunması, prenatal diaqnostikanın imkanlarının genişləndirilməsi və mürəkkəb klinik halların idarə olunması üzrə mütəxəssislərin peşəkar hazırlığının gücləndirilməsi baxımından mühüm əhəmiyyət daşıyır.
