7 sentyabr 2026-cı il tarixində Bakı Fond Birjası Baku Climate Action Week çərçivəsində “Karbon bazarları vasitəsilə iqlim maliyyəsinin imkanlarının açılması” mövzusunda sessiya keçirib.

Sessiya karbon bazarlarının inkişaf tendensiyaları, iqlim maliyyələşməsində rolu və Azərbaycanda karbon bazarı ekosisteminin formalaşdırılması üçün mövcud imkanların müzakirəsinə həsr olunub.

Bakı Fond Birjasının Aparıcı İqtisadçısı Emin Əliyevin moderatorluğu ilə keçirilən sessiyada Azərbaycan Respublikasının Mərkəzi Bankının Maliyyə Sektorunun Dayanıqlı İnkişafı Departamentinin iqtisadçısı Əli Əhmədzadə, AZAL-ın ESG Məlumatlarının idarə edilməsi və Dayanıqlı İnkişaf üzrə biznes partnyoru Məhəmməd Əliyev, “Process Engineering” şirkətinin sahibi və direktoru Elnur Mustafayev, “SOCAR Green” şirkətinin İnvestisiyalar və Layihələrin İnkişafı üzrə direktoru Rza Nağıyev, Unibank-ın Dayanıqlılıq üzrə meneceri Samra Talişinskaya-Abbasova və Bakı Fond Birjasının Yaşıl Maliyyə üzrə məhsul sahibi Aygün Həsənova spiker qismində çıxış ediblər.

Sessiya çərçivəsində karbon bazarlarında qlobal tendensiyalar və son inkişaflar, tənzimlənən və könüllü karbon bazarları arasındakı fərqlər, karbon kreditlərinin yaradılması, sertifikatlaşdırılması, ticarəti və dövriyyədən çıxarılması mexanizmləri müzakirə olunub.

Müzakirələrdə həmçinin birjaların, maliyyə institutlarının və digər bazar infrastrukturu təminatçılarının karbon bazarlarının inkişafındakı rolu, Azərbaycanda karbon bazarlarının formalaşdırılması üçün zəruri institusional və tənzimləyici şərtlər, eləcə də bu sahədə dövlət və özəl sektor arasında əməkdaşlıq imkanları ətrafında fikir mübadiləsi aparılıb.

Tədbir müxtəlif sektorların nümayəndələrini bir araya gətirərək Azərbaycanda karbon bazarlarının inkişaf perspektivləri və iqlim maliyyələşməsinin genişləndirilməsi imkanları üzrə fikir və təcrübə mübadiləsi üçün platforma yaradıb.