Azərbaycan Respublikasının Milli Depozit Mərkəzi (MDM) İsveç Krallığının Stokholm şəhərində keçirilən “PostTrade 360° 2026” tədbiri çərçivəsində Avropa Mərkəzi Depozitarlar Assosiasiyasına (AMDA) üzv qəbul olunub.

MDM-in Assosiasiyaya üzvlüyü ilə bağlı qərar AMDA-nın Direktorlar Şurasının Stokholm şəhərində keçirilən iclasında qəbul edilib. İclasda Milli Depozit Mərkəzinin İdarə Heyətinin sədri Elçin Əlizadə və İdarə Heyəti sədrinin müşaviri Müşfiq Əhmədli iştirak ediblər.

 İclas çərçivəsində AMDA-nın Direktorlar Şurasına Milli Depozit Mərkəzinin Azərbaycanın kapital bazarındakı rolu, institusional və texnoloji inkişaf istiqamətləri, həyata keçirilən islahatlar, eləcə də beynəlxalq əməkdaşlıq imkanları barədə təqdimat həyata keçirilib.

 Avropa Mərkəzi Depozitarlar Assosiasiyası Avropanın post-ticarət (post-trade) və mərkəzi depozitar ekosisteminin aparıcı peşəkar platformalarından biridir. Assosiasiya 40 milli və beynəlxalq mərkəzi depozitarı birləşdirir. Onun üzvləri sırasında “Euroclear”, “Clearstream”, “SIX SIS”, “Nasdaq CSD” və “Euronext Securities” kimi aparıcı maliyyə bazarı infrastrukturları yer alır.

Milli Depozit Mərkəzinin AMDA-ya üzvlüyü Azərbaycanın kapital bazarı infrastrukturunun Avropa maliyyə bazarlarına inteqrasiyasının genişləndirilməsi, qabaqcıl beynəlxalq təcrübə və standartların tətbiqinin təşviqi, eləcə də aparıcı mərkəzi depozitarlarla institusional əməkdaşlığın gücləndirilməsi baxımından mühüm əhəmiyyət daşıyır.