ARDNF-də 2026-cı il üzrə Yay Təcrübə Proqramının bağlanış tədbiri keçirilib.
Tədbirin əvvəlində iştirakçıları salamlayan İnsan resursları departamentinin baş mütəxəssisi Rəna Xalikova proqramın builki nəticələri barədə məlumat verib. Ardınca "ARDNF-də yay necə keçir? Yay Təcrübə Proqramı: iştirakçıların dilindən" adlı videoçarx nümayiş olunub.
Tədbir İcraçı direktorun müşaviri Vadim Pşeniçnıy və İnsan resursları departamentinin direktoru Nigar Braunun iştirak etdiyi panel müzakirəsi ilə davam edib. Panel çərçivəsində Fondun fəaliyyət istiqamətləri və iş prinsipləri, peşəkar fəaliyyətin müxtəlif mərhələləri, karyera seçimi və iş mühitində qarşıya çıxan imkan və çağırışlar barədə fikir mübadiləsi aparılıb. Panelistlər öz peşəkar təcrübələrindən nümunələr paylaşaraq iştirakçıların suallarını cavablandırıb və karyera inkişafı ilə bağlı onları maraqlandıran məsələlərə aydınlıq gətiriblər.
Daha sonra İnvestisiya departamentinin direktor müavini-şöbə müdiri İqrar İsgəndərov "Təcrübə proqramının karyeraya təsiri" mövzusunda çıxış edib. Təcrübə proqramlarının gənclərin peşəkar inkişafında rolu, praktiki bilik və bacarıqların formalaşmasına verdiyi töhfə və gələcək karyera istiqamətinin müəyyənləşdirilməsi baxımından yaratdığı imkanlar çıxışın əsas mövzularını təşkil edib.
Tədbirin sonunda təcrübəçilərə proqramı uğurla başa vurduqlarına görə sertifikatlar təqdim olunub. Dünyanın aparıcı investisiya şirkətlərindən biri olan "Franklin Templeton" ilə pilot layihə çərçivəsində təşkil edilmiş xüsusi təlim proqramının iştirakçıları isə əlavə olaraq həmin şirkətin sertifikatları ilə təltif ediliblər.
Qeyd edək ki, iki ay davam edən “Yay Təcrübə Proqramı”nda iştirakçılar ARDNF-nin müxtəlif struktur bölmələrində əyani tapşırıqlar üzərində işləməklə müvafiq sahələrdə praktiki bilik və vərdişlərə yiyələnib və Fondun əsas fəaliyyət istiqamətləri və iş prinsipləri ilə daha yaxından tanış olmaq imkanı əldə ediblər. Həmçinin təcrübəçilərin peşəkar və şəxsi inkişafını dəstəkləmək məqsədilə ARDNF əməkdaşları tərəfindən bir sıra daxili təlimlər təşkil olunub.
