Azərbaycan Mühasiblər və Risk Peşəkarları Assosiasiyası (ARPA İB) ilə Türkiyə Kurumsal Risk Yönetimi Derneği (KRYD) arasında iki ölkənin risk idarəedilməsi sahəsindəki fəaliyyətini gücləndirmək və birgə layihələr həyata keçirmək məqsədilə Anlaşma Memorandumu (MoU) imzalanıb.
İmzalama mərasimində hər iki qurumun rəhbər şəxsləri və nümayəndə heyətləri iştirak ediblər.Görüşdə Türkiyə tərəfini KRYD Yönetim Kurulu Başkanı Bora Akdoğanlar, Yönetim Kurulu Üyesi / Başkan Yardımcısı A. Arda Koçyan və Yönetim Kurulu Üyesi / Başkan Yardımcısı Volkan Can təmsil ediblər. Azərbaycan tərəfindən isə ARPA İB İdarə Heyətinin sədri Günay Şahbazova, ARPA Risk Komitəsinin sədri Cəlal Rayi, Risk Komitəsinin üzvləri Ramin Rəhimov, Miradəm Ağayev və assosiasiyanın əməkdaşları iştirak ediblər.
Rəsmi imzalama mərasimindən sonra tərəflər arasında iki qardaş ölkənin risk istiqamətindəki mövcud vəziyyəti, qlobal trendlər, qarşılıqlı təcrübə mübadiləsi və gələcək strateji hədəflər ətrafında geniş müzakirələr aparılıb. Görüş zamanı həm rəqəmsal, həm də korporativ risklərin idarə olunmasında birgə təlim, sertifikasiya və maarifləndirmə proqramlarının təşkili barədə ortaq razılığa gəlinib.
ARPA İB İdarə Heyətinin sədri Günay Şahbazova çıxışında bu sənədin regional əməkdaşlıq baxımından tarixi əhəmiyyətini vurğulayıb: "Türkiyənin bu sahədəki qabaqcıl qurumu olan KRYD ilə imzaladığımız memorandum, Azərbaycanda risk idarəedilməsi mədəniyyətinin beynəlxalq standartlara uyğun inkişafına və hər iki ölkənin peşəkarları arasında sarsılmaz bir körpünün qurulmasına xidmət edəcək."
KRYD Yönetim Kurulu Başkanı Bora Akdoğanlar isə öz növbəsində Bakıda göstərilən yüksək qonaqpərvərliyə görə təşəkkür edərək bildirib: "Azərbaycanlı həmkarlarımızla risk idarəedilməsi və strateji dözümlülük mövzusunda eyni hədəfləri bölüşməkdən qürur duyuruq. Bu əməkdaşlıq hər iki qardaş ölkənin korporativ ekosisteminə böyük dəyər qatacaq."
Tədbir rəsmi imzalama və xatirə fotolarının çəkilişindən sonra çay və şirniyyat süfrəsi ətrafında səmimi müzakirələrlə davam edib.
Səfər çərçivəsində Türkiyə nümayəndə heyəti üçün İçərişəhər mədəniyyət turu və rəsmi şam yeməyinin təşkili də nəzərdə tutulub.
