12-17 noyabr 2023-cü il tarixlərində Mərkəzi Gömrük Hospitalının baş həkimi, tibb xidməti polkovnik-leytenantı Bəxtiyar Musayev Almaniya Federativ Respublikasının Düsseldorf şəhərində keçirilən “MEDİCA 2023” Beynəlxalq Tibbi Sərgidə iştirak edib.
Dr.Bəxtiyar Musayev sərgidə iştirak edən şirkətlərin nümayəndələri - Koreyanın “Medicore İnfraqırmızı və HRV Texnologiyaları” şirkətinin Baş Meneceri Damon An, Çinin “Mindsion” şirkətinin meneceri Simon Çen, Türkiyənin Viyolsan şirkətinin ixrac meneceri Gökmen Kaplan və Burak Fakılı, Türkiyənin İzmirdə yerləşən “Turmed” xəstəxana ləvazimatları şirkətinin məsul şəxsi Zahide Türe Peynirçi Ağustoslu və digərləri ilə görüşüb, fikir mübadiləsi aparıb, onların istehsal etdikləri qabaqcıl texnologiyalarla, xəstəxanalarda tətbiq edilən yeni cihazlarla, avadanlıqlarla tanış olub.
Sərgidə müxtəlif ölkələrin tibb və səhiyyə sahəsində istehsalçıları, distribütorları və peşəkarları görüşərək bir araya gəliblər. Burada tibbi avadanlıqlar, tibbi məhsullar, tibbi turizm, tibbi təhsil, dərman vasitələri, vitaminlər və bioloji aktiv əlavələr, innovativ laboratoriya avadanlıqları, optika, stomatologiya, tibbdə informasiya texnologiyaları və s. təqdim olunub.
Qeyd edək ki, MEDİCA 2023 Beynəlxalq Tibbi Sərgi təşkil olunduğu vaxtdan bu günədək dünyanın bir çox şirkətləri, dövlət qurumları arasında əməkdaşlığın qurulması və inkişaf etdirilməsi üçün əhəmiyyətli beynəlxalq platformadır.
