30 iyun – 2 iyul tarixlərində Azərbaycan-Fransa Ticarət və Sənaye Palatası (CCIAF) Kiçik və Orta Biznesin İnkişafı Agentliyinin (KOBİA) tərəfdaşlığı ilə “Post-COVID-19: KOB-ların fəaliyyətinə dəstək” adlı onlayn konfrans təşkil edir. Tədbirin məqsədi müxtəlif strategiya və mexanizmlər barədə KOB-ları məlumatlandırmaqla pandemiyadan zərər çəkmiş biznes sektorlarına dəstək olmaqdır.
Konfransın açılış günü (30 iyun) KOBİA-nın sədri Orxan Məmmədov, Fransanın ölkəmizdəki səfiri Zacharie Gross, Azərbaycanın Fransadakı səfiri Rəhman Mustafayev, Avropa İttifaqının Azərbaycandakı Nümayəndəliyinin rəhbəri Kestutis Jankauskas, AYİB-in Azərbaycan üzrə rəhbəri İvana Duarte, BMT İnkişaf Proqramının Rezident Nümayəndəsi Alessandro Fracassetti, Medef International-ın direktor müavini Geraldine Lembe çıxış edərək KOB-ların fəaliyyətinə dəstəklə bağlı tədbir və proqramlar barədə məlumatlarla çıxış edəcəklər. Açılış sessiyası ingilis dilində olacaq.
Növbəti iki gün ərzində - 1 -2 iyul tarixlərində CCIAF-in üzvü olan Baker Tilly, Deloitte, Ekvita, EY Azərbaycan və PwC Azərbaycan şirkətlərinin ekspertləri turizm, kənd təsərrüfatı və qadın sahibkarlığı istiqamətlərində KOB-lara özünü bərpa mexanizmləri, post-pandemiya dövrü üçün biznes sektorunun bərpası istiqamətində hazırladıqları proqramlarla bağlı seminarlar həyata keçirəcəklər. Seminarlar Azərbaycan dilində həyata keçiriləcək.
Konfrans bütün KOB-lara açıqdır. Hər bir şəxs konfansda iştirak etmək üçün qeydiyyatdan keçməlidir. Konfransda iştirak pulsuzdur. Yalnız qeydiyyatdan keçmiş şəxslər konfransa qoşulma linki alacaq.
Açılış sessiyası üçün qeydiyyat: https://forms.gle/FTdgHwzz8f7U8F1T6
Seminarlar üçün qeydiyyat: https://forms.gle/9TgEeQkJWQ7u3m9j7
Qeydiyyat üçün son tarix: 28 iyun 2020
Qeyd edək ki, CCIAF 2016-cı ildən fəaliyyət göstərir və hazırda 60-dan çox yerli, fransız və beynəlxalq şirkət Palatanın üzvüdür. CCIAF-in əsas məqsədi Azərbaycan ilə Fransa arasında iqtisadi və dostluq əlaqələrinin gücləndirilməsinə kömək etməkdir. Palata üzv şirkətlər üçün yeni biznes tərəfdaşları, potensial müştəri və sahibkarlar ilə tanışlıq imkanlarının artırılması, mütəmadi olaraq mövcud bazar imkanları haqqında məlumatların yayılması, biznes sahəsindəki yeni imkanlar barədə məlumatın ötürülməsi məqsədilə mütəmadi olaraq tədbirlər və biznes görüşlər həyata keçirir.
