Dövlət Gömrük Komitəsi Tibbi Xidmət İdarəsinin Mərkəzi Hospitalının əməkdaşları üçün “Səhiyyə müəssisələrinin yanğın təhlükəsizliyi” mövzusunda maarifləndirici tədbir keçirilib
9 iyul 2026-cı il tarixində Mərkəzi Gömrük Hospitalında Fövqəladə Hallar Nazirliyinin Dövlət Yanğın Nəzarəti və Dövlət Yanğından Mühafizə xidmətlərinin təşkilatçılığı ilə Dövlət Gömrük Komitəsi Tibbi Xidmət İdarəsinin Mərkəzi Hospitalının əməkdaşları üçün “Səhiyyə müəssisələrinin yanğın təhlükəsizliyi” mövzusunda maarifləndirmə tədbiri keçirilib.
Tədbirdə Dövlət Gömrük Komitəsinin Tibbi Xidmət İdarəsinin rəis müavini Şahlar Mirqasım, Fövqəladə Hallar Nazirliyinin Dövlət Yanğın Nəzarəti Xidmətinin təbliğat sektorunun rəisi Əlibala Əlizadə, Dövlət Gömrük Komitəsinin yanğın təhlükəsizliyi üzrə mütəxəssis Zaur Əliskəndərov, şöbə rəisləri və əməkdaşlar iştirak ediblər.
Tədbirin keçirilməsində məqsəd Dövlət Gömrük Komitəsi Tibbi Xidmət İdarəsinin Mərkəzi Hospitalının əməkdaşlarına fövqəladə hallar, o cümlədən xəstəxanalarda yanğınlarla bağlı davranış qaydalarının aşılanması olub.
Tədbirdə açılış nitqi ilə çıxış edən Dövlət Gömrük Komitəsinin Tibbi Xidmət İdarəsinin rəis müavini Şahlar Mirqasım səhiyyə müəssisələrində yanğın təhlükəsizliyi qaydalarına ciddi əməl olunmasının, fövqəladə hallara operativ və düzgün reaksiya verilməsi üçün əməkdaşların nəzəri bilik və praktiki bacarıqlarının daim təkmilləşdirilməsinin vacibliyini vurğulayıb. Rəis müavini Şahlar Mirqasım bildirib ki, belə maarifləndirici tədbirlər əməkdaşlarda təhlükəsizlik mədəniyyətinin formalaşmasına, risklərin minimuma endirilməsinə və pasiyentlərin, eləcə əməkdaşların hazırlıq səviyyəsinin artırılmasına imkan yaradır.
Fövqəladə Hallar Nazirliyinin Dövlət Yanğın Nəzarəti Xidmətinin Təbliğat sektorunun rəisi Əlibala Əlizadə tədbirdə təqdimatla çıxış edərək səhiyyə müəssisələrində yanğın təhlükəsizliyi, xəstəxanalarda yanğın risklərinin qarşısının alınması, yanğın baş verdiyi zaman əməkdaşların operativ və düzgün hərəkət etməsi, xəstələrin təhlükəsiz və çevik şəkildə təxliyəsinin təşkili, təxliyə yollarının daim açıq saxlanılması, yanğın xəbərverici sistemlərin saz vəziyyətdə olması, eləcə də tibb müəssisələrində istifadə olunan elektrik və qaz avadanlıqlarından təhlükəsiz istifadə, elektrik cihaz və qurğularının “Elektrik Qurğularının Quraşdırılması Qaydaları”nın tələblərinə uyğun quraşdırılaraq istismar edilməsi, həmin avadanlıqlara dövri yoxlanılması barədə ətraflı məlumat verib.
O, bildirib ki, səhiyyə müəssisələrində yanğın təhlükəsizliyi təkcə maddi sərvətlərin deyil, ilk növbədə insan həyatının qorunmasına xidmət edir. Bu baxımdan hər bir əməkdaşın fövqəladə hallarda üzərinə düşən vəzifələri bilməsi və təhlükəsizlik qaydalarına ciddi əməl etməsi mühüm əhəmiyyət daşıyır. Tədbirdə səhiyyə müəssisələrində yanğın təhlükəsizliyi qaydaları ilə bağlı maarifləndirici çarxlar nümayiş olunub.
Tədbirin sonunda iştirakçılarla geniş fikir mübadiləsi aparılıb, onları maraqlandıran suallar cavablandırılıb. Qeyd olunub ki, yanğın təhlükəsizliyi sahəsində maarifləndirmə tədbirlərinin mütəmadi təşkili əməkdaşların fövqəladə hallara hazırlıq səviyyəsinin yüksəldilməsinə, operativ qərarvermə bacarıqlarının inkişafına və səhiyyə müəssisələrində təhlükəsizliyin təmin edilməsinə xidmət edən mühüm amillərdəndir.
