Azərbaycan Respublikasının Mərkəzi Bankı məsafədən maliyyə xidmətləri sahəsində risklərin azaldılması və istehlakçıların hüquqlarının qorunmasının gücləndirilməsi istiqamətində normativ bazanın təkmilləşdirilməsini davam etdirir. Bu çərçivədə Mərkəzi Bankın İdarə Heyətinin 28.04.2026-cı il tarixli 18/11 nömrəli Qərarı ilə “Banklarda kredit risklərinin idarə edilməsi Qaydası”na və “Bank olmayan kredit təşkilatlarında kredit risklərinin idarə edilməsi Qaydası”na dəyişikliklər təsdiq edilib.

Dəyişikliklərə əsasən, müştərilərə məsafədən istehlak krediti müqavilələrinin bağlanmasına və kredit limitlərinin artırılmasına qarşı könüllü məhdudiyyət tətbiq etmək imkanı yaradılır. Belə ki, artıq vətəndaşlar Azərbaycan Kredit Bürosu üzərindən (Findoc.az) sorğu yerləşdirməklə bütün kredit təşkilatlarına onun adına məsafədən kredit rəsmiləşdirilməsinə qadağa qoya biləcəklər. Bundan əlavə, vətəndaşlar müştərisi olduqları kredit təşkilatına birbaşa müraciət etməklə yalnız həmin təşkilata məhdudiyyət tətbiq edə biləcəklər. Kredit təşkilatları məsafədən kredit rəsmiləşdirilmədən öncə bu qadağanı yoxlamalı və yalnız məhdudiyyət qoyulmadığı halda krediti verməlidirlər.

Qaydalara edilən növbəti mühüm dəyişiklik məsafədən bağlanılan istehlak krediti müqavilələri üzrə vəsaitlərin verilməsində “gözləmə müddəti”nin tətbiq edilməsidir. Belə ki, kreditin məbləği minimum əmək haqqının iki mislinədək olduqda vəsait 2 saat, bu həddi aşdıqda isə 24 saat sonra hesaba oturacaqdır.

Qeyd edək ki, dəyişikliklərin əsas məqsədi məsafədən kreditləşmə zamanı müştərilərin maraqlarının və təhlükəsizliyinin qorunması, kredit risklərinin daha məsuliyyətli idarə edilməsi mexanizmlərinin möhkəmləndirilməsidir.

Dəyişikliklər 1 oktyabr 2026-cı il tarixindən qüvvəyə minəcək.

“Banklarda kredit risklərinin idarə edilməsi Qaydası”na və “Bank olmayan kredit təşkilatlarında kredit risklərinin idarə edilməsi Qaydası”na dəyişiklikləri bu linkdən nəzərdən keçirmək mümkündür:

https://e-qanun.az/framework/62061