Birləşmiş Millətlər Təşkilatının (BMT) Gürcüstanda keçirilən Dövlət Xidməti Forumunda iştirak məqsədilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyevin rəhbərlik etdiyi nümayəndə heyəti Tbilisidə səfərdədir.
Səfər çərçivəsində Dövlət Agentliyinin sədri xalqımızın Ümummilli Liderinin abidəsini ziyarət edərək xatirəsini böyük ehtiramla yad edib.
Sonra Dövlət Agentliyinin sədri Dövlət Xidməti Forumunun açılış mərasimində iştirak edib.
“Dövlət institutlarının transformasiyası: İnnovasiyanın, iştirakın və inklüzivliyin inkişafı” mövzusunda keçirilən forumun açılış mərasimində Gürcüstanın Baş naziri İrakli Kobaxidze, BMT Baş katibinin iqtisadi və sosial məsələlər üzrə müavini Li Junhua və müxtəlif ölkələrin yüksək səviyyəli rəsmiləri iştirak ediblər.
Forum çərçivəsində Şri-Lankanın və Banqladeşin müvafiq sahə üzrə fəaliyyət göstərən nazirləri, eləcə də Gürcüstanın ədliyyə naziri ilə ikitərəfli görüşlər keçirilib.
Şri-Lanka və Banqladeş nümayəndələri ilə görüşlərdə "ASAN xidmət"in fəaliyyət istiqamətləri və əldə etdiyi nailiyyətlər barədə geniş təqdimat edilib. Hər iki tərəf "ASAN xidmət" modelinin öz ölkələrində tətbiqi ilə bağlı niyyətlərini bildirib.
Gürcüstanın ədliyyə naziri ilə keçirilən görüşdə isə forumun yüksək səviyyədə təşkil olunması münasibətilə təbriklər çatdırılıb, qarşılıqlı əməkdaşlıq məsələləri ətrafında fikir mübadiləsi aparılıb.
Dövlət Agentliyinin sədrinin Gürcüstana səfəri davam edir.
