“Yaşıl Maliyyə və İqlim Risklərinin İdarəedilməsi üzrə Peşəkar İnkişaf Proqramı” layihəsinin təqdimatı məqsədilə Neftçala Rayon İcra Hakimiyyətində rayon icra hakimiyyətinin başçısı cənab Mirhəsən Seyidov və aidiyyəti struktur bölmələrin nümayəndələri ilə işgüzar görüş keçirilmişdir.

Görüş zamanı layihənin məqsədi, hədəfləri, gözlənilən nəticələri və Neftçala rayonu üçün yaradacağı sosial-iqtisadi və institusional faydalar barədə ətraflı məlumat təqdim edilmişdir. Müzakirələr zamanı rayonun iqlim dəyişikliklərindən təsirlənən əsas sahələri, xüsusilə kənd təsərrüfatı, balıqçılıq, su ehtiyatlarının idarə olunması və ekoloji dayanıqlılıq məsələləri ətrafında fikir mübadiləsi aparılmışdır.

Tərəflər layihə çərçivəsində həyata keçiriləcək təlim proqramları, maarifləndirmə tədbirləri və praktik təşəbbüslər üzrə mümkün əməkdaşlıq istiqamətlərini müzakirə etmiş, yerli qurumların prosesə cəlb olunması və iştirakçıların seçimi ilə bağlı fikir mübadiləsi aparmışlar. Həmçinin layihənin nəticələrinin rayonun dayanıqlı inkişaf məqsədlərinə töhfə verəcəyi və gələcəkdə daha geniş əməkdaşlıq imkanları yarada biləcəyi vurğulanmışdır.

Görüş qarşılıqlı əməkdaşlıq perspektivlərinin dəyərləndirilməsi, layihənin uğurlu icrası üçün zəruri dəstək mexanizmlərinin müəyyənləşdirilməsi və gələcək birgə fəaliyyət istiqamətlərinin nəzərdən keçirilməsi baxımından məhsuldar olmuşdur.

Neftçala Rayon İcra Hakimiyyəti tərəfindən layihənin məqsəd və vəzifələri müsbət qiymətləndirilmiş, regionda iqlim risklərinin idarə olunması və yaşıl maliyyə yanaşmalarının təşviqinə yönəlmiş təşəbbüslərin əhəmiyyəti xüsusi qeyd edilmişdir.