Ukrayna ilə iqtisadi əməkdaşlığın prioritet istiqamətləri, Orta Dəhlizin strateji üstünlükləri və regional bağlantıların gücləndirilməsində rolu müzakirə edilib.

İqtisadiyyat naziri Mikayıl Cabbarov Ümumdünya Şəhərsalma Forumu (WUF13) çərçivəsində Ukraynanın Baş nazirinin yenidənqurma işləri üzrə müavini, icmalar və ərazilərin inkişafı naziri Oleksiy Kuleba ilə görüşüb.

Görüş zamanı Azərbaycan ilə Ukrayna arasında iqtisadi-ticarət əməkdaşlığının mövcud vəziyyəti və gələcək inkişaf perspektivləri müzakirə olunub. Tərəflər iki ölkə arasında qarşılıqlı faydalı tərəfdaşlığın inkişaf etdirilməsinin regional iqtisadi inteqrasiyanın gücləndirilməsi baxımından mühüm əhəmiyyət daşıdığını vurğulayıblar.

Müzakirələrdə Orta Dəhlizin strateji üstünlükləri xüsusi qeyd olunub. Bildirilib ki, bu marşrut Avropa ilə Asiya arasında yükdaşımaların sürətləndirilməsi, logistika imkanlarının genişləndirilməsi və regional bağlantıların möhkəmləndirilməsi baxımından mühüm rol oynayır. Eyni zamanda, sənaye, energetika, infrastruktur, nəqliyyat və tranzit sahəsində əməkdaşlığın genişləndirilməsinin iqtisadi əlaqələrin inkişafına töhfə verəcəyi diqqətə çatdırılıb.

Görüşdə, həmçinin, SOCAR ilə tərəfdaşlığın inkişaf etdirilməsi və birgə təşəbbüslərin reallaşdırılması imkanları barədə fikir mübadiləsi aparılıb.