15 may 2026-cı il tarixində Bakı Fond Birjası Britaniya-Azərbaycan Ticarət Palatasının Davamlılıq və Enerji Komitəsi tərəfindən təşkil olunan Dayanıqlı Maliyyə mövzusunda panel müzakirəsində iştirak edib.

Müzakirələrdə Azərbaycan Respublikasının Mərkəzi Bankı, Azərbaycan Biznesin İnkişafı Fondu, Bakı Fond Birjası və AZAL nümayəndələri iştirak edərək yaşıl maliyyənin Azərbaycanın iqlim və iqtisadi inkişaf hədəflərinə necə dəstək verə biləcəyi mövzusunda fikir mübadiləsi aparıblar.

Panel zamanı Azərbaycanın “Network for Greening the Financial System” (NGFS) təşkilatına üzvlüyü, milli Yaşıl Taksonomiyanın hazırlanması, ESG risklərinin inteqrasiyası və yaşıl təşəbbüslərin maliyyələşdirilməsi imkanları kimi istiqamətlərdə əldə olunan irəliləyişlər vurğulanıb.

Kapital bazarlarının potensialı ilə bağlı çıxış edən Bakı Fond Birjasının Ticarət və Dəstək şöbəsinin rəhbəri Fərid Abbaszadə dayanıqlı kapital bazarının qlobal miqyasda həcminin 9.1 trilyon ABŞ dollarına çatdığını qeyd edib. O, Azərbaycanın yaşıl istiqrazlar və dayanıqlılıqla əlaqəli istiqrazlar (Sustainability-Linked Bonds – SLB) kimi alətlər vasitəsilə yaşıl investisiyaların cəlb olunması üçün mühüm potensiala malik olduğunu bildirib.

Tədbirdə həmçinin Azərbaycanda etibarlı və güclü dayanıqlı maliyyə ekosisteminin formalaşdırılması üçün müxtəlif sektorlar arasında əməkdaşlığın əhəmiyyəti xüsusi vurğulanıb.