14 may 2026-cı il tarixində “Bilim Quba” mərkəzinin fəaliyyətə başlamasının 1 ili tamam olur.
Mərkəz “ASAN xidmət”in “İnnovasiyalar Mərkəzi”nin “Bilim Azərbaycan” layihəsi çərçivəsində fəaliyyət göstərir.
Quba “ASAN Həyat” kompleksində yerləşən mərkəzdə təbiət elmləri laboratoriyası, riyaziyyat laboratoriyası, astronomiya, kosmos və aviasiya laboratoriyası və dizayn laboratoriyası fəaliyyət göstərir. Hər bir laboratoriyada eyni vaxtda 20 nəfər olmaqla, ümumilikdə 80 şagird təlimlərdə iştirak edə bilər.
Ötən müddət ərzində mərkəzdə təşkil olunan müxtəlif istiqamətli tədbirlərdə fərdi olaraq 3000-ə yaxın uşaq, məktəblərdən isə 2000-dən çox şagird iştirak edib. 20-dən çox fərqli layihəyə isə 6000-ə yaxın şagird və valideyn qoşulub.
Ümumilikdə “Bilim Quba” mərkəzinin fəaliyyətlərindən yararlanan şagird sayı 11 300 nəfərdən çoxdur.
Burada gələcəyin tələblərinə uyğun layihə əsaslı və problem yönümlü təhsil yanaşmasını tətbiq edən “Deneyap” texnologiya proqramı da həyata keçirilir. 2025-ci ilin aprel ayında Qubada təşkil olunan seçim imtahanında 1000 şagird arasından seçilən 80 nəfər sözügedən proqramda təhsil almaq hüququ qazanıb. Bu çərçivədə şagirdlər 11 fərqli mövzu üzrə texnologiya və layihələrin inkişafına əsaslanan təlimlərə cəlb olunublar.
“Bilim Azərbaycan” layihəsi 2021-ci ilin 23 sentyabrında Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Türkiyə Texnologiya Komandası Fondu (T3 Fondu) arasında imzalanmış Anlaşma Protokolu əsasında həyata keçirilir. Məqsəd 6–14 yaş arası uşaqlarda elm, texnologiya, sahibkarlıq və innovasiya sahələrinə marağı artırmaq, onları XXI əsrin tələblərinə uyğun bilik və bacarıqlarla təmin etməkdir.
Layihənin ilk nümunəsi olan “Bilim Bakı” mərkəzi 2022-ci ilin 28 mayında Azərbaycan Prezidenti İlham Əliyevin, Türkiyə Prezidenti Rəcəb Tayyib Ərdoğanın və Nobel mükafatı laureatı professor Əziz Sancarın iştirakı ilə istifadəyə verilib.
