İqtisadiyyat Nazirliyi Azərbaycan Respublikası Prezidentinin 2016-cı il 5 oktyabr tarixli Fərmanı ilə təsdiq edilmiş “Xarici ölkələrə ixrac missiyalarının və Azərbaycan ərazisinə alıcı missiyalarının təşkilinə, xarici bazarların araşdırılması və marketinq fəaliyyətinə, “Made in Azerbaijan” brendinin xarici bazarlarda təşviqinə, yerli şirkətlərin ixracla bağlı beynəlxalq sertifikat almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsi hesabına ödənilən hissəsinin müəyyənləşdirilməsi və ödənilmə mexanizminin tənzimlənməsi Qaydası”na (bundan sonra – Qayda) uyğun olaraq “Beynəlxalq sərgi və yarmarkalarda fərdi qaydada iştirak” dəstək tədbiri üzrə ixracatçıların müraciətlərinin qəbulunu elan edir.

Beynəlxalq sərgi və ya yarmarkada fərdi qaydada iştirakla bağlı ixracatçılara ödənilən dəstək məbləği aşağıdakı istiqamətlər üzrə çəkilmiş xərclərin 50%-ni (10 min manatdan artıq olmamaqla) təşkil edir:

· Sərgi və ya yarmarkanın keçirildiyi məkanda yerin icarəsi;

· Sərgi və ya yarmarkanın keçirildiyi məkanda stendin dizaynı, hazırlanması və quraşdırılması;

· Nümayiş etdiriləcək məhsulların sərgi və ya yarmarkanın keçirildiyi məkana daşınması.

Beynəlxalq sərgi və yarmarkalarda fərdi qaydada iştirakla bağlı dəstək məbləği aşağıdakı qaydada ödənilir:

· Beynəlxalq sərgi və yarmarkalarda fərdi qaydada iştirakın başa çatdığı tarixdən 30 iş günü ərzində dəstək məbləğinin əldə edilməsi üçün ərizə ilə müraciət edilir;

· Ərizəyə aşağıdakılar əlavə edilir:

· Görülmüş işi, göstərilmiş xidməti və ya icarə haqqını təsdiq edən sənəd (hesab-faktura (invoys);

· Bağlanmış müqavilənin əsli və ya notarial qaydada təsdiq olunmuş surəti;

· Vəsaitin ödənilməsini və ya xərcin çəkilməsini təsdiq edən sənədin əsli və ya notarial qaydada təsdiq olunmuş surəti;

· Beynəlxalq sərgi və ya yarmarkada fərdi qaydada iştirakla bağlı yazılı, foto və ya video hesabat.

Müraciətə ümumilikdə 30 iş günü ərzində baxılır:

· Müraciət qeydiyyata alındığı tarixdən etibarən 2 iş günü ərzində ərizənin və ona əlavə edilmiş sənədlərin Qaydaya uyğunluğu yoxlanılır;

· Ərizə və ona əlavə edilmiş sənədlər Qaydaya uyğun olmadıqda, çatışmazlıqların aradan qaldırılması üçün müraciətçiyə məlumat təqdim edilir;

· Çatışmazlıqlar məlumat alındığı vaxtdan ən geci 10 iş günü ərzində aradan qaldırılmalıdır;

· Çatışmazlıqlar aradan qaldırıldıqdan sonra müddətin axımı davam edir.

Dəstək məbləğinin ödənilməsi haqqında qərar qəbul edildiyi gündən 20 iş günü ərzində dəstək məbləği müraciətçinin bank hesabına köçürülür.

2026-2027-ci illər üçün “Beynəlxalq sərgi və yarmarkalarda fərdi qaydada iştirak” dəstək tədbiri üzrə dəstək məbləğinin ödənilməsi barədə qərar müraciətdə göstərilən sərgi və ya yarmarkanın aşağıdakı meyarlara uyğunluğuna əsasən verilir:

Asiya, Avropa, Afrika, Şimali Amerika, Cənubi Amerika və Avstraliya qitələrində sənaye, tikinti və inşaat materialları, İKT, təhsil, səhiyyə, kənd təsərrüfatı, qida sənayesi və ərzaq məhsulları, tekstil, dizayn, turizm və logistika sahələri üzrə keçiriləcək beynəlxalq sərgi və yarmarkalarda fərdi qaydada iştiraka görə dəstək məbləğinin ödənilməsi üçün müraciət edilə bilər.

Sənədlər Azərbaycan Respublikasının İxracın və İnvestisiyaların Təşviqi Agentliyinə - AZPROMO-ya təqdim olunmalıdır:

Ünvan: Azərbaycan, Bakı, AZ1000, Neftçilər pr., 32, Bakı Biznes Mərkəzi. 

Əlaqə vasitələri:

Tel: (+994 12) 598-01-47/48 (daxili - 3674);

E-mail: zahra.baghirova@azpromo.gov.az;     

Mob: (+994 50) 735-67-35;

Əlaqələndirici şəxs: Zəhra Bağırova.