24 aprel 2026-cı il tarixində Bakı Fond Birjası (BFB) ADA Universitetində təşkil olunmuş “Karyera Həftəsi”ndə iştirak etmişdir.
Tədbir zamanı Bakı Fond Birjasının nümayəndələri tərəfindən tələbələrə Birjanın fəaliyyəti, maliyyə bazarlarındakı rolu, kapital bazarlarının inkişafındakı əhəmiyyəti və ümumilikdə investisiya mühiti barədə ətraflı məlumat təqdim olunmuşdur. Bununla yanaşı, iştirakçılara Bakı Fond Birjasında mövcud olan karyera imkanları, işə qəbul prosesi, tələbələr və yeni məzunlar üçün nəzərdə tutulmuş təcrübə proqramları haqqında geniş izahat verilmişdir.
Tədbir çərçivəsində tələbələrlə interaktiv müzakirələr aparılmış, onların sualları cavablandırılmış və real iş mühiti ilə bağlı praktiki biliklər paylaşılmışdır. Bu, iştirakçıların maliyyə sektoru haqqında daha dolğun təsəvvür formalaşdırmasına və gələcək karyera seçimlərini daha düzgün istiqamətləndirməsinə imkan yaradır.
Görüşün nəticəsi olaraq, 90-a yaxın tələbə Bakı Fond Birjasının təcrübə proqramında iştirak etmək üçün müraciət etmişdir ki, bu da gənclərin kapital bazarlarına artan marağının göstəricisidir.
Qeyd edək ki, ADA Universitetinin Karyera Xidmətlərinin təşəbbüsü ilə təşkil olunan “Karyera Həftəsi” tələbə və məzunların əmək bazarının tələbləri ilə yaxından tanış olması, müxtəlif sahələr üzrə aparıcı təşkilatlarla birbaşa ünsiyyət qurması və peşəkar inkişaf imkanlarını dəyərləndirməsi baxımından mühüm platformadır.
Bakı Fond Birjası olaraq, gənc istedadların inkişafına dəstək göstərmək, onların maliyyə bazarları sahəsində bilik və bacarıqlarını artırmaq və gələcək peşəkar kadrların formalaşmasına töhfə vermək əsas prioritetlərimizdəndir.
