20-21 aprel 2026-cı ildə Mərkəzi Bank dəstəyi ilə maliyyə sektorunun iştirakçıları üçün kibertəhlükəsizlik risklərinin idarə olunması mövzusunda təlimlər keçirilib.

Estoniyanın e-İdarəetmə Akademiyası (eGA) ilə birgə interaktiv formatda təşkil olunan sessiyaların məqsədi maliyyə sektorunda kibertəhlükəsizlik üzrə bilik və bacarıqların artırılması, eləcə də beynəlxalq təcrübənin paylaşılması olub.

Mərkəzi Bankın İnformasiya və kibertəhlükəsizlik departamentinin direktoru Elnur Eyvazlı kibertəhdidlər və risk mühiti, bu sahədə tətbiq olunan normativ çərçivə və rəqəmsal əməliyyat dayanıqlılığına dair tələblər barədə iştirakçıları məlumatlandırıb.

Təlimlər çərçivəsində kiberrisklərin idarə olunması üzrə müasir yanaşmalar, nəzarət və koordinasiya funksiyalarını həyata keçirən qurumların rolu, eləcə də sektor daxilində və beynəlxalq səviyyədə əməkdaşlıq imkanları müzakirə olunub. İştirakçılar üçün praktik məşğələlər təşkil edilib, real situasiyalar əsasında risklərin qiymətləndirilməsi və idarə olunması üzrə bacarıqların inkişafına diqqət yetirilib.

Təlim sessiyalarında Azərbaycan Banklar Assosiasiyası və maliyyə sektorunun nümayəndələri iştirak ediblər.

Qeyd edək ki, təlim Avropa İttifaqı tərəfindən maliyyələşdirilən və Şərq Tərəfdaşlığı ölkələrində kiberdavamlılığın artırılmasını hədəfləyən beynəlxalq təşəbbüs çərçivəsində təşkil olunub.