ABB-nin İdarə Heyətinin sədri Abbas İbrahimovun açıqlamasına əsasən, ABB Maliyyə Qrupunun 2025-ci il üzrə maliyyə hesabatlarına kənar auditor tərəfindən rəy verilib. Məlumata görə, maliyyə qrupu hesabat ilini 404.491 milyon manat xalis mənfəətlə başa vurub ki, bu da bankın tarixində rekord göstərici hesab olunur.

Bildirilib ki, bank rəhbərliyi tərəfindən səhmdarlara 200 milyon manat məbləğində dividend ödənişi təklif edilib. Təklif Ümumi Yığıncaqda təsdiqlənəcəyi halda, səhmdarlar nominal dəyər üzrə 15,6% dividend gəliri əldə edəcəklər.

Eyni zamanda qeyd olunub ki, ABB son 8 il ərzində ardıcıl olaraq dividend ödənişi həyata keçirir. Son iki il ərzində isə bankın gəlirləri 30 mindən artıq səhmdar arasında bölüşdürülüb.

Xatırladaq ki, 17–24 sentyabr 2024-cü il tarixlərində Bakı Fond Birjasında ABB səhmlərinin İlkin Kütləvi Təklif (IPO) üsulu ilə yerləşdirilməsi yekunlaşıb. Nəticələrə əsasən, ABB səhmlərinə 33 mindən çox investor tərəfindən 50 minə yaxın sifariş təqdim olunub və bütün sifarişlər icra edilib.

IPO-dan sonra ABB-nin fiziki şəxs səhmdarlarının sayı 1 794 nəfərdən 35 104 nəfərə yüksəlib. Bununla yanaşı, bankda özəl səhmdar payı 7,8%-ə çatıb.