Azərbaycan Texnologiya Universitetinin tələbələri “Gəncə KOB evi”ndə olub 

Tələbələrə “Gəncə KOB” evinin iş prosesi və burada sahibkarlara göstərilən xidmətlər barədə məlumat verilib. 

Azərbaycan Texnologiya Universitetinin (ATU) İnnovasiya Mərkəzinin nümayəndələri və universitetin bir qrup tələbəsi bu yaxınlarda sahibkarların istifadəsinə verilmiş “Gəncə KOB evi”ndə olub.

“Gəncə KOB evi”nin əməkdaşları tərəfindən müəllim və tələbələrə KOB evi modeli və iş prinsipi, burada biznes subyektlərinə göstərilən “G2B” və “B2B” xidmətlər barədə ətraflı məlumat verilib, onları maraqlandıran suallar cavablandırılıb. Bildirilib ki, “Gəncə KOB evi” Gəncə ilə yanaşı, ətraf şəhər və rayonların sahibkarlarına da xidmət edir. Ümumilikdə burada dövlət və özəl qurumlar tərəfindən sahibkarlara 80-dən çox xidmət göstərilir. Sahibkarlara xidmətlərin vahid məkanda göstərilməsi dövlət xidmətlərinə sürətli və rahat çıxış, vaxta və əməliyyat xərclərinə qənaət KOB evlərinin başlıca üstünlükləridir.

KOB evi ilə tanışlıq zamanı “Gəncə KOB evi” və ATU arasında gələcək əməkdaşlıq imkanlarına dair fikir mübadiləsi də aparılıb.