Maliyyə Nazirliyində Slovakiya səfiri ilə əməkdaşlıq məsələləri müzakirə edilib

Martın 11-də Azərbaycan Respublikasının maliyyə nazirinin birinci müavini Anar Kərimov Slovakiya Respublikasının Azərbaycandakı fövqəladə və səlahiyyətli səfiri Elçin Qasımov ilə görüşüb.

Görüşdə Azərbaycanla Slovakiya arasında əməkdaşlığın mövcud vəziyyəti və inkişaf perspektivləri müzakirə olunub. 

A.Kərimov qeyd edib ki, iki ölkə arasında münasibətlər 7 may 2024-cü il tarixində imzalanmış Birgə Bəyannamə ilə təsis edilmiş Strateji Tərəfdaşlıq çərçivəsində inkişaf edir, yüksək səviyyəli təmaslar və qarşılıqlı səfərlər əlaqələrin daha da möhkəmlənməsinə mühüm töhfə verir.

Eyni zamanda, iqtisadi əməkdaşlıq məsələlərinə toxunan A.Kərimov qarşılıqlı ticarət əlaqələrinin genişləndirilməsi üçün böyük perspektivlərin olduğunu vurğulayıb, Slovakiya Respublikasının Baş nazirinin müavini və iqtisadiyyat naziri Denisa Sakovanın Azərbaycana planlaşdırılan səfərinin iqtisadi əməkdaşlığın inkişafına əlavə təkan verəcəyinə ümidvar olduğunu qeyd edib.

Görüş zamanı həmçinin, Slovakiyanın işğaldan azad edilmiş ərazilərdə aparılan bərpa və yenidənqurma işlərinə göstərdiyi maraq yüksək qiymətləndirilib və Ağdam rayonunda məktəbin tikintisinə verdiyi dəstək xüsusi qeyd olunub.

Öz növbəsində, səfir E.Qasımov iki ölkə arasında investisiya, enerji və nəqliyyat sahələrində əməkdaşlığın böyük potensiala malik olduğunu bildirib. O, xüsusilə enerji sahəsində əməkdaşlıq çərçivəsində Slovakiyaya Azərbaycan qazının pilot tədarükünün həyata keçirildiyini və Slovakiyanın dövlətə məxsus əsas qaz sənayesi şirkətinin Cənub Qaz Dəhlizi Məşvərət Şurasının iclaslarında iştirakının əhəmiyyətini vurğulayıb.

Görüş zamanı, həmçinin təhsil, elm, mədəniyyət, gənclər və idman sahələrində əməkdaşlığın genişləndirilməsi imkanları müzakirə olunub və qarşılıqlı maraq doğuran məsələlər ətrafında fikir mübadiləsi aparılıb.