Azərbaycan Respublikası Maliyyə Nazirliyinin nümayəndə heyəti 23-25 fevral tarixlərində Serbiya Respublikasının Maliyyə Nazirliyində işgüzar səfərdə olub. Səfər çərçivəsində iki ölkənin maliyyə qurumları arasında dövlət maliyyəsinin idarə olunması sahəsində əməkdaşlığın genişləndirilməsi və təcrübə mübadiləsinin aparılması məqsədilə görüşlər keçirilib.

Görüşlər zamanı dövlət maliyyəsinin rəqəmsal idarəedilməsi, dövlət büdcəsi gəlirlərinin proqnozlaşdırılması və təhlili, eləcə də xəzinədarlıq ilə bağlı proseslərin təşkili və optimallaşdırılması istiqamətlərində təqdimatlar və müzakirələr aparılıb.

Tərəflər rəqəmsal transformasiya çərçivəsində büdcə planlaşdırılması, fiskal intizamın gücləndirilməsi, gəlirlərin daha dəqiq proqnozlaşdırılması mexanizmləri və real vaxt rejimində maliyyə monitorinqi alətlərinin tətbiqi sahəsində təcrübələrini bölüşüblər. Xüsusilə, xəzinədarlıq əməliyyatlarının avtomatlaşdırılması, büdcə icrasının elektron nəzarət mexanizmləri və analitik hesabatlılıq platformalarının inkişafı məsələləri diqqət mərkəzində olub.

Qeyd olunub ki, Azərbaycan və Serbiya arasında mövcud iqtisadi və institusional əməkdaşlıq münasibətləri maliyyə sahəsində də davamlı inkişaf etməkdədir. Bu səfər dövlət maliyyəsinin idarə olunması sahəsində qabaqcıl təcrübələrin öyrənilməsi və tətbiqi baxımından mühüm əhəmiyyət kəsb edir.