Müasir informasiya dövründə ictimaiyyətlə əlaqələr artıq təkcə rəsmi açıqlamalar və yazılı məlumatlarla məhdudlaşmır. İnsanlar informasiyanı daha sürətli, daha şəffaf və daha səmimi formada almaq istəyirlər. Məhz bu səbəbdən canlı yayımlar sosial şəbəkələrdə müasir PR strategiyasının ən təsirli alətlərindən birinə çevrilib.

Canlı yayım sadəcə video format deyil. Bu, auditoriya ilə birbaşa ünsiyyət, qarşılıqlı etimad və açıq dialoq platformasıdır. Ənənəvi kommunikasiya birtərəfli məlumat ötürməyə əsaslanırdısa, canlı efir sual-cavab, fikir mübadiləsi və real zamanlı reaksiya imkanı yaradır. Bu isə PR-ın əsas prinsipi olan qarşılıqlı ünsiyyət modelini gücləndirir.

Xüsusilə səhiyyə sahəsində insanlar etibarlı və dəqiq məlumat axtarışındadırlar. Həkimlərin və mütəxəssislərin sosial şəbəkələr vasitəsilə canlı çıxış etməsi, sualları birbaşa cavablandırması və mürəkkəb tibbi mövzuları sadə dildə izah etməsi cəmiyyətdə güvən yaradır.

Canlı efirdə mimika, səs tonu və təqdimat üslubu da mesajın qəbuluna təsir edir. Bu isə yazılı mətndən fərqli olaraq daha emosional və daha təsirli kommunikasiya imkanı verir.

Peşəkar PR yanaşmasına görə, hər bir kommunikasiya fəaliyyəti planlı və məqsədyönlü olmalıdır. Canlı yayım da istisna deyil.Əvvəlcəmaarifləndirmə nə məqsəd daşımasını müəyyənləşdirmək lazımdır. Məqsəd aydın olduqda mesaj da daha təsirli olur.

Canlı yayımın texniki tərəfi də az əhəmiyyət daşımır. Aydın səs, düzgün işıqlandırma, səliqəli fon və rahat çıxış mühiti peşəkarlıq göstəricisidir. Xüsusilə tibbi müəssisələr üçün vizual səliqə və rəsmi atmosfer etimad faktorunu artırır.İzləyici ilk saniyələrdə qərar verir: izləsin, yoxsa keçsin. Buna görə təqdimatın estetik və texniki səviyyəsi vacibdir.

Dezinformasiya və ya yanlış məlumat yayıldığı hallarda canlı yayımlar sürətli və şəffaf açıqlama vermək üçün ən effektiv vasitələrdən biridir.Belə hallarda rəsmi mövqe gecikmədən faktlara əsaslanan məlumat təqdim edilməlidir. Həmçinin, auditoriyanın sualları açıq şəkildə cavablandırılmalıdır. Şəffaflıq reputasiyanın qorunmasının əsas şərtidir.

Səhiyyə sektorunda canlı efirlərin əsas məqsədi reklam deyil, cəmiyyətin sağlamlıq savadlılığını artırmaqdır. Profilaktik müayinələrin əhəmiyyəti, düzgün həyat tərzi, erkən diaqnostika və müasir müalicə üsulları barədə məlumatların birbaşa çatdırılması həm sosial məsuliyyət, həm də effektiv PR nümunəsidir.

Bu format həkimlə vətəndaş arasında psixoloji məsafəni azaldır, müraciət etməyi asanlaşdırır və açıq kommunikasiya mühiti yaradır.Sosial şəbəkələrdə canlı yayımlar müasir ictimaiyyətlə əlaqələrin dinamik və təsirli formasıdır. Düzgün planlaşdırılmış, peşəkar şəkildə təşkil olunmuş və səmimi təqdim edilmiş canlı efirlər təşkilatın reputasiyasını möhkəmləndirir, ictimai etimadı artırır və davamlı kommunikasiya platforması yaradır.Canlı ünsiyyət informasiya deyil, münasibət yaradır. Müasir PR isə məhz bu münasibətlərin üzərində qurulur.

Dilarə Zamanova

Mərkəzi Gömrük Hospitalının

PR üzrə mütəxəssisi