Fevralın 23-də Prezident İlham Əliyev Vergi Məcəlləsində, “Banklar haqqında” və “Gömrük tarifi haqqında” qanunlarda dəyişiklik edilməsi barədə 2026-cı il 13 fevral tarixli 355-VIIQD nömrəli Qanun və onun tətbiqi ilə əlaqədar Azərbaycan Respublikası Prezidentinin bəzi fərmanlarında dəyişiklik edilməsi haqqında Fərman imzalayıb.

Dəyişikliklər bir sıra məsələlərlə yanaşı, dövlət maliyyə nəzarətinin gücləndirilməsi məqsədilə bank sirri təşkil edən məlumatların təqdim edilməsi ilə bağlı yeni mexanizmləri müəyyən edir. Belə ki, dövlət orqanlarının (qurumlarının), dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərin (maliyyə bazarlarını tənzimləyən qanunlarla Mərkəzi Bankın nəzarət etdiyi subyektlər istisna olmaqla), dövlət adından yaradılan publik hüquqi şəxslərin, habelə dövlət büdcəsindən maliyyə vəsaiti alan digər təşkilatların bank hesabları üzrə müşahidə funksiyalarının həyata keçirilməsi ilə bağlı bank sirrini təşkil edən məlumatların banklar tərəfindən Maliyyə Nazirliyinə təqdim edilməsi nəzərdə tutulub.

Eyni zamanda, dövlət orqanları (qurumları), dövlət mülkiyyətində olan və nəzarət zərfi dövlətə məxsus hüquqi şəxslər, eləcə də dövlət adından yaradılan publik hüquqi şəxslər vergi orqanında uçota alındıqda, yenidən təşkil edildikdə və ya uçotdan çıxarıldıqda bu barədə məlumatların (vergi ödəyicisinin adı, VÖEN-i və bank hesabları göstərilməklə) növbəti ayın 15-dək elektron qaydada Maliyyə Nazirliyinə təqdim edilməsi təsbit edilib.

Bundan başqa, həmin qurumlara məxsus bank hesabları barədə məlumatlar vergi orqanına daxil olduqdan sonra, bank əməliyyatları aparan şəxslər tərəfindən bu məlumatların vergi orqanına təqdim edildiyi gündən sonrakı 1 iş günü müddətində elektron formada Maliyyə Nazirliyinə ötürülməsi nəzərdə tutulur.

Daha ətraflı: https://maliyye.gov.az/news/6475/maliyye-nezaretinin-guclendirilmesi-ile-bagli-yeni-mexanizmler-mueyyenlesdirilib