Səfərlər Yeni Kompüterləşdirilmiş Tranzit Sistemi (NCTS) üzrə hər iki ölkənin praktiki təcrübəsinin öyrənilməsi, tətbiq mexanizmləri ilə yaxından tanışlıq və Azərbaycanın bu sistemə qoşulması istiqamətində proseslərin sürətləndirilməsi məqsədilə təşkil olunub.

Türkiyə Respublikasına səfər çərçivəsində səlahiyyətli yük göndərən statusuna malik olan TOBB UND Logistika Mərkəzi ziyarət olunub. Şirkət tərəfindən NCTS çərçivəsində tətbiq olunan zəmanət mexanizmləri, qlobal və fərdi təminat alətləri, zəmanətlərin elektron idarə olunması və monitorinqi mexanizmləri barədə ətraflı məlumat verilib.

Nümayəndə heyəti daha sonra Ankara Gar Gömrük Müdürlüyündə NCTS bəyannamələrinin rəsmiləşdirilməsi prosesi, tranzit əməliyyatının başlanması və təyinat gömrük orqanında tamamlanması mərhələləri, nəzarət formalarının seçilməsi və əməliyyatların real vaxt rejimində izlənilməsi mexanizmləri ilə tanış olub.

Səfər çərçivəsində həmçinin Ankara Logistika Mərkəzində tətbiq edilən rəqəmsal həllər, tranzit yüklərinin konsolidasiyası, gömrük nəzarətinin logistika zənciri ilə inteqrasiyası, daşıyıcı və brokerlərlə operativ informasiya mübadiləsi, eləcə də tranzit əməliyyatlarının koordinasiyalı idarə olunması mexanizmləri barədə təqdimat keçirilib.

Gürcüstan Respublikasındakı görüşlər zamanı isə NCTS-in tətbiqi prosesi, elektron məlumat mübadiləsi, risklərin idarə olunması və institusional koordinasiya məsələləri üzrə müzakirələr aparılıb.

Nümayəndə heyəti “Qırmızı Körpü” gömrük postunda real nümunə əsasında TIR nəqliyyat vasitələrinin sərhəd keçidi zamanı NCTS bəyannaməsinin təqdim edilməsi, məlumatların sistem üzərindən yoxlanılması, risk əsaslı nəzarət tədbirlərinin seçilməsi və tranzit əməliyyatının davam etdirilməsi mərhələləri ilə praktiki şəkildə tanış olub.

Səfərlər çərçivəsində əldə olunmuş təcrübə Azərbaycanın “Ümumi Tranzit Proseduru haqqında Konvensiya”ya və “Mallarla ticarətdə sənədləşmənin sadələşdirilməsi haqqında Konvensiya”ya qoşulması istiqamətində həyata keçirilən tədbirlər baxımından mühüm əhəmiyyət kəsb edir.