10-12 fevral tarixlərində Qazaxıstan Respublikasının Astana şəhərində Ümumdünya Gömrük Təşkilatı (ÜGT) və Yaponiya Beynəlxalq Əməkdaşlıq Agentliyinin (JICA) birgə layihəsi çərçivəsində “Malların Buraxılış Vaxtının Ölçülməsi (Time Release Study - TRS) Proqramı”nın ikinci sessiyası keçirilib.

Sessiyada Azərbaycan, Gürcüstan, Qazaxıstan, Qırğızıstan, Tacikistan, Türkmənistan, Özbəkistan və Ermənistanın gömrük orqanlarının nümayəndələri iştirak ediblər.

Tədbirin əsas məqsədi iştirakçı ölkələrin TRS metodologiyasının tətbiqi sahəsində bilik və bacarıqlarının gücləndirilməsi, bu istiqamətdə milli təcrübələrin paylaşılması və regional əməkdaşlığın inkişaf etdirilməsi olub. Sessiya çərçivəsində hər bir ölkənin nümayəndəsi təqdimatla çıxış edərək TRS-in tətbiqi üzrə mövcud təcrübəni, əldə olunan nəticələri və qarşıda duran hədəfləri iştirakçılarla bölüşüb.

Təlim sessiyaları zamanı TRS-in müstəqil və davamlı şəkildə həyata keçirilməsi üçün tələb olunan metodoloji yanaşmalar, məlumatların toplanması və təhlili mexanizmləri, eləcə də nəticələrin qərar qəbuletmə prosesində istifadəsi məsələləri barədə müzakirələr aparılıb.

Azərbaycan Respublikasının gömrük xidməti tərəfindən sessiya iştirakçılarına TRS-in tətbiqi ilə əlaqədar həyata keçirilən rəqəmsal həllər və avtomatlaşdırılmış yanaşmalar barədə məlumat verilib.  Qeyd olunub ki, rəqəmsal alətlərin tətbiqi malların buraxılış müddətlərinin daha dəqiq ölçülməsinə, proseslərin optimallaşdırılmasına və şəffaflığın artırılmasına mühüm töhfə verir.

Sessiya regional səviyyədə TRS-in tətbiqinin gücləndirilməsi, təcrübə mübadiləsinin genişləndirilməsi və gömrük prosedurlarının daha da təkmilləşdirilməsi baxımından əhəmiyyətli platforma rolunu oynayıb.