Yanvarın 30-da Dövlət Gömrük Komitəsinin yaradılmasının 34-cü ildönümü - gömrük əməkdaşlarının peşə bayramı günü münasibətilə tədbir keçirilib.
Tədbirdən əvvəl Dövlət Gömrük Komitəsinin əməkdaşları Fəxri xiyabana gələrək Ümummilli Lider Heydər Əliyevin xatirəsini ehtiramla yad edib, məzarı önünə əklil qoyublar. Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər çiçəklər düzülüb.
Sonra Şəhidlər xiyabanında Azərbaycanın müstəqilliyi və ərazi bütövlüyü uğrunda mübarizədə canlarından keçən qəhrəman Vətən övladlarının xatirəsi anılıb.
Dövlət Gömrük Komitəsində keçirilən mərasimdə Azərbaycan Respublikasının Dövlət Himni səsləndirildikdən sonra Ümummilli Lider Heydər Əliyevin, torpaqlarımızın azadlığı uğrunda canlarını fəda etmiş şəhidlərimizin xatirəsi bir dəqiqəlik sükutla yad edilib.
Sonra Azərbaycan Respublikası Prezidentinin Dövlət Gömrük Komitəsinin əməkdaşlarına ali xüsusi rütbələrin verilməsi və Dövlət Gömrük Komitəsi əməkdaşlarının təltif edilməsi haqqında sərəncamları tədbir iştirakçılarının diqqətinə çatdırılıb.
Təqaüddə olan gömrükçülər adından çıxış edən Nüsrət Qurbanov gömrükçü peşəsinin əhəmiyyətindən bəhs edib, gömrük əməkdaşlarının hərtərəfli dövlət qayğısı ilə əhatə olunduğunu vurğulayıb.
Dövlət Gömrük Komitəsinin sədri, gömrük xidməti general-polkovniki Şahin Bağırov Prezident İlham Əliyev tərəfindən gömrük xidmətinə göstərilən diqqət və qayğıya görə çoxsaylı gömrük əməkdaşları adından minnətdarlığını bildirib, peşə bayramı günü münasibətilə bütün şəxsi heyəti təbrik edib. Qeyd edilib ki, dövlət başçısının strateji baxışı nəticəsində gömrük sisteminin inkişafı üçün konkret hədəflər müəyyən olunub və bu hədəflərə nail olmaq məqsədilə ardıcıl tədbirlər həyata keçirilir, gömrük əməkdaşları qarşıya qoyulan vəzifələrin öhdəsindən layiqincə gəlmək üçün bundan sonra da bütün qüvvə və bacarıqları ilə çalışacaqlar.
Dövlət Gömrük Komitəsinin 2025-ci ildəki fəaliyyətində baş verən mühüm hadisələr və yeniliklərlə bağlı videoçarx nümayiş etdirilib.
Xidmətdə fərqlənən gömrük əməkdaşları ilə bağlı təltif əmrləri də tədbir iştirakçılarının diqqətinə çatdırılıb.
Sonda tədbir iştirakçıları adından Azərbaycan Respublikasının Prezidenti İlham Əliyevə gömrük xidməti əməkdaşlarına göstərilən qayğı və diqqətə görə minnətdarlıq bildirilib və müraciət ünvanlanıb.
