Mərkəzi Bank və Maliyyə Monitorinqi Xidməti tərəfindən maliyyə institutları üçün cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində növbəti təlim keçirilib

Azərbaycan Respublikasının “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Qanununun 5-ci maddəsinə əsasən öhdəlik daşıyan şəxslər digər öhdəlik daşıyan şəxslərin (üçüncü şəxslərin) bu Qanunun 4-cü maddəsinə uyğun olaraq apardıqları müştəri uyğunluğu tədbirlərinə və ya işgüzar münasibətlərin yaradılması məqsədilə yeni müştərinin təqdimatı zamanı digər öhdəlik daşıyan şəxslər tərəfindən əldə edilmiş məlumat və sənədlərə güvənə bilərlər. Qanunun bu tələbinə dair 11 dekabr 2025-ci il tarixində Azərbaycan Respublikası Mərkəzi Bankı və Maliyyə Monitorinqi Xidməti tərəfindən banklar, bank olmayan kredit təşkilatları, investisiya şirkətləri, həyatın yığım sığortası ilə məşğul olan sığortaçılar, təkrarsığortaçılar, sığorta vasitəçiləri, ödəniş təşkilatları, elektron pul təşkilatları, maliyyə lizinqi xidmətləri göstərən şəxslər və lombardların 200 nəfərdən çox əməkdaşları üçün onlayn formatda təlim keçirilib.

Təlimdə qanunvericiliyin tələbləri ilə yanaşı praktikada onların tətbiqinə dair müzakirələr aparılıb, iştirakçıların sualları cavablandırılıb.