Naxçıvan Baş Gömrük İdarəsində “Gömrük nəzarəti üsulları və vasitələri tətbiq olunmaqla gömrük baxışının və yoxlamasının həyata keçirilməsinə dair Metodika” ilə bağlı təlim keçirilib.
Naxçıvan Baş Gömrük İdarəsinin rəisi, gömrük xidməti general-mayoru Vüqar Əliyevin, Gömrük İnzibatçılığı Baş İdarəsinin rəisi Orxan Nuriyevin iştirakı ilə keçirilən təlimdə qlobal ticarətin sürətlə inkişaf etdiyi bir dövrdə operativliyin, təhlükəsizliyin və xidmət keyfiyyətinin yüksəldilməsi istiqamətində diqqətin daha da artırıldığı vurğulanıb.
Bildirilib ki, “Gömrük nəzarəti üsulları və vasitələri tətbiq olunmaqla gömrük baxışının və yoxlamasının həyata keçirilməsinə dair Metodika” gömrük baxışı və yoxlamasının aparılması ardıcıllığını və nəticəsi üzrə yerinə yetirilməli olan tədbirləri dəqiq müəyyən etməklə yanaşı, effektivliyin artırılmasına əlavə imkanlar yaradır.
Təlimdə yoxlama prosesinin, həmçinin yoxlama tapşırıqları və nəticələrinin elektron idarəetmə sistemi üzərindən rəsmiləşdirilməsi mexanizmləri izah olunub, mümkün yoxlama ssenariləri, metodlar və riskə əsaslanan yanaşmalar üzrə praktik nümunələr təqdim edilib.
Təlim çərçivəsində nəqliyyat vasitələrinin sərhəd qeydiyyatı prosesi, idxal və ixrac gömrük nəzarəti xəttləri üzrə baxış prosedurları və yük terminallarında aparılan yoxlama işləri yaxından izlənilib, əməkdaşların sualları cavablandırılıb.
