Cenevrədə UNECE-nin 71-ci sessiyasında ölkəmizi təmsil edən iqtisadiyyat nazirinin birinci müavini Elnur Əliyev Orta Dəhliz Qrupu adından Birgə Bəyanatla çıxış edib.
Cenevrədə keçirilən BMT-nin Avropa üzrə İqtisadi Komissiyasının (UNECE) "Dayanıqlı gələcək üçün iqlim fəaliyyəti və davamlı infrastruktur" mövzusunda 71-ci sessiyası keçirilib.
Tədbirdə qlobal ətraf mühit problemləri ilə əlaqədar birgə səylər, iqlim dəyişmələrinin nəticələrini azaldan, gələcək nəsillər üçün daha dayanıqlı və təhlükəsiz infrastruktur sistemlərini dəstəkləyən innovativ həllərin əhəmiyyəti vurğulanıb. Bu istiqamətdə regional tərəfdaşlığın, hökumətlər, beynəlxalq təşkilatlar və biznes nümayəndələri arasında əməkdaşlığın önəmi qeyd edilib.
Tədbirdə iqtisadiyyat nazirinin birinci müavini Elnur Əliyev Azərbaycan, Türkiyə, Gürcüstan, Qazaxıstan, Özbəkistan, Qırğızıstan, Tacikistan, Türkmənistan və Macarıstan nümayəndə heyətləri adından Birgə Bəyanatla çıxış edib.
Bəyanatda Transxəzər Nəqliyyat Dəhlizinin (Orta Dəhliz) Asiya ilə Avropanı birləşdirən strateji nəqliyyat marşrutu kimi əhəmiyyəti vurğulanıb. Bildirilib ki, coğrafi mövqeyinə və infrastruktur potensialına görə bu dəhlizdə yer alan ölkələr tərəfindən Cenevrədəki daimi nümayəndəliklər arasında Orta Dəhliz Qrupu yaradılıb. Qrupun yaradılmasında məqsəd Orta Dəhlizin səmərəli fəaliyyətinin beynəlxalq səviyyədə təşviqi, potensialının tam reallaşdırılması və yaşıl enerjiyə keçidin sürətləndirilməsidir. Qeyd olunub ki, innovasiya və investisiyaların artırılması, ticarətin genişləndirilməsi üçün prosedurların sadələşdirilməsi, rəqəmsallaşmanın sürətləndirilməsi regional əməkdaşlığı daha da gücləndirəcək.
Sessiya çərçivəsində qlobal iqlim gündəliyinə uyğun olaraq yüksək səviyyəli dialoq, panel iclas və dəyirmi masalar keçirilib.
