Aprelin 4-də Səmərqənd şəhərində Dövlət Turizm Agentliyinin sədrinin müavini Azadə Hüseynova ilə Özbəkistan Respublikasının Turizm Komitəsinin sədri Ümid Şadıyev arasında görüş keçirilib.
Görüşdə Azərbaycan və Özbəkistan arasında mövcud turizm əlaqələrinin gücləndirilməsi perspektivləri, beynəlxalq təşkilatlar çərçivəsində əməkdaşlıq, İpək Yolu sahəsində birgə aparıla biləcək əməkdaşlıq imkanları haqqında geniş fikir mübadiləsi aparılıb.
Görüş zamanı, həmçinin Azərbaycan Turizm Bürosu və Özbəkistanın Milli Təbliğat Mərkəzi arasında turizm sahəsində əməkdaşlıq üzrə memorandum imzalanıb.
Memorandumu Azərbaycan tərəfindən Azərbaycan Turizm Bürosunun İdarə Heyətinin sədri Florian Zenqstşmid və Özbəkistan tərəfindən Özbəkistanın Milli Təbliğat Mərkəzinin direktoru Dilşod Murodullayev imzalayıb.
Sənəddə "İpək Yolu turları" birgə təşəbbüsü çərçivəsində turist axınını artırmaq, Mərkəzi Avropa və digər beynəlxalq bazarlarda mövqeləri gücləndirmək məqsədilə əməkdaşlıq, birgə turizm məhsullarının hazırlanması, təbliğat tədbirlərinin və B2B görüşlərinin təşkili məsələləri əksini tapır.
Səfər çərçivəsində Azadə Hüseynova ilə BMT Turizmin Səmərqənddə yerləşən Turizm Akademiyasının direktoru Dilşod Narzıkulov arasında görüş keçirilib. Görüşdə turizm təhsili sahəsində Azərbaycan və Özbəkistan arasında qarşılıqlı əməkdaşlığın inkişafı üzrə birgə addımların atılmasının vacibliyi qeyd edilib. Görüşün sonunda, həmçinin "İpək Yolu" Beynəlxalq Turizm və Mədəni İrs Universitetinə tanışlıq turu təşkil edilib.
Universitet nəzdində fəaliyyət göstərən İpək Yolu Tədqiqat Mərkəzi ilə birgə əməkdaşlıq çərçivəsində İpək Yolunun turizm məhsulu kimi inkişaf etdirilməsi sahəsində birgə araşdırmaların aparılması haqqında razılığa gəlinib.
