İyunun 5-də Dövlət Turizm Agentliyinin sədri Fuad Nağıyev İsmayıllının Basqal qəsəbəsində vətəndaşların qəbulunu keçirib. Görüşdə sakinləri maraqlandıran suallar cavablandırılıb, onların fikirləri dinlənilib və müvafiq tapşırıqlar verilib.

Qəbulda nadir memarlığı, qədim ipəkçilik, dəmirçilik kimi xalq sənətkarlıq ənənələri və orta əsr şəhərsalma mədəniyyəti ilə Azərbaycanın mədəniyyət tarixində xüsusi əhəmiyyətə malik Basqalın turizm potensialının tanıdılması məqsədilə son dövrlərdə görülən tədbirlərin əhəmiyyəti qeyd olunub. Bərpa və yenidənqurma işlərindən sonra qəsəbəyə turistik səfərlərin sayında xeyli artımın müşahidə olunduğu, bununla əlaqədar qəsəbənin sosial-iqtisadi həyatında canlanmanın yaranmasına, turizmlə bağlı məşğulluq imkanlarının artmasına töhfə verdiyi bildirilib.

Vətəndaşlarla görüşdə İsmayıllı Rayon İcra Hakimiyyətinin başçısı Nahid Bağırov da iştirak edib.

DTA tərəfindən Azərbaycan Respublikasının Prezidentinin “Basqal Dövlət Tarix Memarlıq Qoruğu haqqında” 2018-ci il 3 oktyabr tarixli Sərəncamından irəli gələn tapşırıqların icrası məqsədilə qoruq ərazisində turizm infrastrukturunun yaradılması üçün mərhələli şəkildə təmir, tikinti və bərpa işləri aparılıb.  

İlkin mərhələdə bazar meydanı ərazisində XVII əsrə aid tarixi hamam bərpa olunub, 7 emalatxana təmir olunub. İkinci mərhələdə bazar meydanı ərazisində qoruq üçün inzibati bina tikilmiş, ərazidə abadlıq işləri aparılmışdır. Küçələrin 1600 m-lik hissəsində divarlar, döşəmələr, qapı və darvazalar bərpa olunaraq tarixi mühitə uyğunlaşdırılıb, küçələr işıqlandırılıb, qəsəbənin girişində avtomobillər üçün dayanacaq, turizm məlumat mərkəzi tikilərək istifadəyə verilib.

Qeyd edək ki, Azərbaycan Respublikasının Prezidenti İlham Əliyev və birinci xanım Mehriban Əliyeva ötən ilin avqust ayında “Basqal” Dövlət Tarix-Memarlıq Qoruğuna səfər edərək burada aparılan yenidənqurma və bərpa işləri ilə yaxından tanış olublar.

Növbəti mərhələ üzrə Şeyx Məhəmməd və Hacı Bədəl məscidinin bərpası, Basqal Mədəniyyət evinin əsaslı təmiri, keçmiş məktəb binasının (çoxtəyinatlı turizm mərkəzi) əsaslı təmiri, 6 tarixi evin bərpası planlaşdırılır.

Bununla yanaşı, Basqala səfər edən turistlərin sayı artan templə davam etdiyindən, Basqal meydanından Basqal tarixi qəbirstanlığa gedən yolun abadlaşdırılaraq turizm marşrutuna əlavə olunması, Partizan Məmmədin evinin təmir olunaraq muzeyin yaradılması və digər işlər də nəzərdə tutulur.