Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini Şahlar Mirqasım, Tibbi Xidmət İdarəsinin Sanitar-Karantin Xidmətinin rəisi Surxay Məmmədov və baş müfəttişi Hüseyn Qasımov 4-7 noyabr 2025-ci il tarixlərində Ümumdünya Səhiyyə Təşkilatının (ÜST) Avropa Regional Bürosu və ÜST-nin Cənubi Qafqaz üzrə Səhiyyə Fövqəladə Hallar Mərkəzi tərəfindən ölkədə tənəffüs yolları patogenləri pandemiyasına hazırlıq üzrə keçirilən masaüstü simulyasiya təlimində iştirak ediblər.

Xatırladaq ki, 2024-cü ilin dekabr ayında respirator patogen pandemiyalarına hazırlıq planlarının yenilənməsi ilə bağlı yeni qlobal tövsiyələrin dərc olunması və 2023-cü ildə Azərbaycanın səhiyyə fövqəladə hallara hazırlıq imkanlarının Birgə Xarici Qiymətləndirilməsinin əsas nəticə və tövsiyələri nəzərə alınmaqla, Səhiyyə Nazirliyinin rəhbərliyi və ÜST-nin dəstəyi ilə mövcud “Milli Qrip Pandemiyasına Hazırlıq Planı”nın yenilənməsi məqsədilə çoxtərəfli seminar təşkil edilmişdir.

Planın nəzərdən keçirilməsi və təkmilləşdirilməsi prosesində əsas mərhələlərdən biri masaüstü simulyasiya məşqinin keçirilməsi olub. ÜST-nin Avropa Regional Bürosu və ÜST-nin Cənubi Qafqaz üzrə Səhiyyə Fövqəladə Hallar Mərkəzi tərəfindən təşkil olunan bu təlimdə Səhiyyə Nazirliyi, TƏBİB, Azərbaycan Qida Təhlükəsizliyi Agentliyi, Ekologiya və Təbii Sərvətlər Nazirliyi, Daxili İşlər Nazirliyi, Müdafiə Nazirliyi və Dövlət Gömrük Komitəsinin nümayəndə heyətləri iştirak ediblər.

Qeyd edək ki, Dövlət Gömrük Komitəsi Tibbi Xidmət İdarəsinin rəis müavini Şahlar Mirqasım digər beynəlxalq ekspertlərlə yanaşı, bu tədbirdə fasilitator qismində çıxış edib.