Mərkəzi Bankın strateji dəstəyi ilə Türk dünyasında sığorta və rəqəmsal texnologiyaların inkişafına həsr olunmuş “Türk Dövlətləri Insurtech Zirvəsi” başlayıb.

Mərkəzi Bankın baş direktoru Vüsal Qurbanov açılış nitqində sığortanın yalnız maliyyə sabitliyinin mühüm dayağı deyil, həm də cəmiyyətin sosial rifahını və gələcəyə inamını təmin edən strateji mexanizm olmasını qeyd edib. O, sığortanın gələcəyinin yalnız klassik prinsiplərlə deyil, texnologiyanın gətirdiyi yeniliklər əsasında formalaşdığını vurğulayıb.

Baş direktor “insurtech”lərin ənənəvi sığorta modellərinin təqdim etdiyi standartlaşmış məhsullardan fərqli olaraq fərdi ehtiyaclara uyğunlaşdırılmış sığorta həlləri, real vaxt rejimində risk qiymətləndirməsi və şəffaf xidmətlər təqdim etdiyini bildirib.

O, həmçinin Azərbaycanın sığorta bazarında “insurtech”lərin tətbiqi, xüsusi tənzimləmə rejimləri və rəqəmsal transformasiyanın yerli və qlobal bazarlara təsirlərinin Mərkəzi Bankın xüsusi diqqət mərkəzində olduğunu qeyd edib.

Vüsal Qurbanov Türk dövlətləri arasında təcrübə və texnologiya mübadiləsi, birgə startap təşəbbüsləri və vahid məlumat platformalarının yaradılmasına imkanlar yaradan bu tədbirin Türk dünyasının “insurtech” xəritəsində yeni səhifə açacağına, praktik tərəfdaşlıqlar, ortaq layihələr və yeni ideyalarla nəticələnəcəyinə inamını ifadə edib.

Mərkəzi Bankın Sığorta fəaliyyətinin tənzimlənməsi departamentinin direktoru Pənah Bənnayev sammit çərçivəsində keçirilmiş “Türk ölkələrində sığorta bazarının tənzimləyici icmalı” müzakirə panelinin spikerlərindən olub. O, Mərkəzi Bankın və Türk dövlətlərinin əsas strateji prioritetlərindən birinin sığorta sektorunun maliyyə dayanıqlılığının gücləndirilməsi olduğunu bildirib. Pənah Bənnayev sektorda korporativ idarəetmə, risk idarəetməsi, xüsusilə də ictimaiyyətə məlumatların açıqlanması üzrə tənzimləmələrin Mərkəzi Bank tərəfindən beynəlxalq standartlara uyğun olaraq həyata keçirildiyini vurğulayıb.

Qeyd edək ki, iki gün davam edəcək sammit Türkiyənin Ticarət Nazirliyinin təşkilatçılığı, Türkiyənin Xidmət İxracatçıları Birliyi, Azərbaycan Sığortaçılar Assosiasiyası və "New Generation Management Company" şirkətinin birgə əməkdaşlığı keçirilir.