Mərkəzi Bank tərəfindən 27 oktyabr tarixində Bakı Slavyan Universitetində (BSU) Jurnalistika fakültəsində təhsil alan tələbələr üçün “İqtisadi jurnalistikanın inkişafına dəstək proqramı”nın açılış mərasimi keçirilib.
Tədbirdə Mərkəzi Bankın və BSU-nun nümayəndələri iştirak ediblər. Mərkəzi Bankın nümayəndələri BSU rəhbərliyinə göstərilən dəstəyə görə təşəkkür edərək kommunikasiyanın ictimai rəyin formalaşmasında mühüm rolunu vurğulayıblar. Daha sonra Mərkəzi Bankın media ilə tərəfdaşlığının gücləndirilməsi və ictimai kommunikasiyanın genişləndirilməsi istiqamətində həyata keçirilən ardıcıl təşəbbüslərdən danışıblar.
Mərkəzi Bankın nümayəndələri çıxışlarında gələcəyin peşəkar iqtisadi jurnalistləri olacaq tələbələrin bu sahədə informasiya tərəfdaşları kimi mühüm rol oynayacaqlarına inamlarını ifadə ediblər.
Beləliklə, 30-dan artıq tələbənin iştirakı ilə ilk sessiya başlayıb. Bu sessiya Mərkəzi Bankın Pul siyasətinin hesabatlılığı şöbəsinin rəisi Təranə Əlirzayeva tərəfindən “Makroiqtisadiyyatın əsasları və jurnalistikada tətbiqi” mövzusunda keçirilib. Təlimdə pul siyasətinin məqsəd və alətləri, proqnozlaşdırma prinsipləri, həmçinin mərkəzi bankçılıq kommunikasiyasının müasir trendləri barədə məlumat verilib.
Tədbirdə Mərkəzi Bankın rəsmi internet səhifələri və maliyyə savadlılığına dair elektron resursları barədə də məlumat verilib.
Qeyd edək ki, milli mətbuatın yaranmasının 150 illik yubileyi ilə əlaqədar Mərkəzi Bank tərəfindən keçirilən tədbirlərin davamı olan bu proqramın məqsədi gənc jurnalistlərin iqtisadiyyat və maliyyə sahəsində məlumatlılığının artırılmasına, həmçinin bu istiqamətdə ixtisaslaşmasına töhfə verməklə peşəkar fəaliyyətə ruhlandırmaqdır. Təlim çərçivəsində Mərkəzi Bankın nümayəndələri tərəfindən mərkəzi bankçılıqla bağlı 8 əsas istiqamət üzrə sessiyaların keçirilməsi nəzərdə tutulub.
Mərkəzi Bank mütəmadi olaraq məktəblərdə və ali təhsil müəssisələrində təlimlər, həmçinin peşəkar jurnalistlər üçün xüsusi proqramlar təşkil etməklə, ölkədə maliyyə savadlılığının artırılmasına və peşəkar kadrların formalaşdırılmasına töhfə verir.
