Azərbaycan Respublikası Dövlət Gömrük Komitəsinin Tibbi Xidmət İdarəsi və Naxçıvan Dövlət Universiteti arasında imzalanmış əməkdaşlıq Memorandumuna əsasən Naxçıvan Dövlət Universitetinin Tibb fakültəsinin VI kursunda təhsil alan bir qrup tələbə Mərkəzi Gömrük Hospitalında cərrahiyyə, daxili xəstəliklər, təcili tibbi yardım, ailə saölamlığı və seçmə fənn üzrə müxtəlif şöbələrdə təcrübə proqramına başlayıblar.
Təcrübı proqramının ilk günü - 15 sentyabr 2025-ci il tarixində Mərkəzi Gömrük Hospitalında Naxçıvan Dövlət Universitetinin Tibb fakültəsinin təcrübə pruqramına başlayan tələbələri ilə görüş keçirilib. Tədbirdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Mərkəzi Gömrük Hospitalının Ümumi Cərrahiyyə şöbəsinin ümumi cərrahı, tibb elmləri doktoru Dr. Aynur Səfiyeva, Dövlət Universitetinin Tibb fakültəsinin tələbələri iştirak ediblər.
Tədbiri giriş sözü ilə açan Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev tələbələri təcrübə proqramına başlamaları münasibətilə təbrik edib, bu mərhələnin onların həkim kimi formalaşmasında mühüm rol oynayacağını vurğulayıb və onların gələcəkdə peşəkar bilikləri, humanizm dəyərləri və əzmkarlıqları ilə Azərbaycan səhiyyəsinə dəyərli töhfələr verəcəklərinə əminliyini ifadə edib.
Daha sonra Ümumi Cərrahiyyə şöbəsinin ümumi cərrahı, tibb elmləri doktoru Dr. Aynur Səfiyeva çıxış edərək tələbələri təcrübə proqramına başlamaları münasibətilə təbrik edib, onlara uğurlar arzulayıb. O, təcrübə müddətinin gənc həkimlər üçün nəzəri bilikləri praktik bacarıqlarla zənginləşdirmək baxımından mühüm əhəmiyyət kəsb etdiyini qeyd edərək, Mərkəzi Gömrük Hospitalının peşəkar həkim heyətindən öyrənməyin tələbələrin gələcək peşəkar inkişafı üçün unikal bir imkan olduğunu vurğulayıb.
Tədbirin sonunda tələbələrin müxtəlif mövzularda ünvanladıqları suallar cavablandırılıb, onların maraq doğuran sahələr üzrə fikirləri dinlənilib. Həkimlər tələbələrin gələcək peşəkar inkişafı ilə bağlı məsləhətlər verib, təcrübə proqramının gedişatı barədə ətraflı məlumat təqdim ediblər.
Daha sonra tələbələr Mərkəzi Gömrük Hospitalının müvafiq şöbələrinə yönləndirilib və hər biri seçdikləri sahə üzrə praktiki bilik və bacarıqlarını inkişaf etdirməyə başlayıb. Qeyd edək ki, təcrübə proqramı tələbələrin gələcəkdə ixtisaslı həkim kimi formalaşmasına, nəzəri biliklərini praktik bacarıqlarla möhkəmləndirməsinə və xəstələrlə işləmə təcrübəsi qazanmasına xidmət edir. Bu cür proqramlar gənc mütəxəssislərin Azərbaycan səhiyyəsinin gələcəyində daha hazırlıqlı və savadlı kadrlar kimi yetişməsinə mühüm töhfə verir.
