7 may 2025-ci il tarixində Beynəlxalq Muğam Mərkəzində “Lady Femida” genişmiqyaslı hüquq forumu keçirildi. Forumda ölkənin müxtəlif sahələrindən qadın hüquqşünasları, vəkilləri, mediatorları, hakimləri, hüquq müdafiəçiləri və hüquq üzrə ekspertlər iştirak etdi. Tədbirdə gender bərabərliyi, mövcud qanunvericilik və hüquqşünas qadınların üzləşdiyi problemlər ətrafında geniş müzakirələr aparıldı.
Forum "Konstitusiya və Suverenlik İli” çərçivəsində baş tutub.
Forumun açılış mərasimində Azərbaycan Respublikasının Milli Məclisinin Ailə, Qadın və Uşaq Məsələləri Komitəsinin sədri, millət vəkili Hicran Hüseynova, millət vəkilləri Əminə Ağazadə və Nigar Arpadarai çıxış edərək qadınların hüquqi sistemdə rolunun gücləndirilməsi, qanunvericiliyin gender həssaslığının artırılması və regional əməkdaşlığın əhəmiyyəti barədə fikirlərini bölüşdülər.
Eyni zamanda, forumda Azərbaycan Respublikasının Mediasiya Şurasının sədri Nadir Adilov, Azərbaycan Respublikasının Vəkillər Kollegiyasının Rəyasət Heyətinin üzvləri Lalə Nağıyeva və Rəhilə Ağaguliyeva çıxış ediblər.
Forumun açılış nitqi ilə “İnjuria” hüquq platformasının rəhbəri Kəmalə Məmmədova çıxış edərək tədbirin məqsədləri və əhəmiyyəti barədə iştirakçılara məlumat verdi. O, qeyd etdi ki, bu forum qadın hüquqşünasların həmrəyliyini, təcrübə mübadiləsini və ölkələrarası hüquqi əməkdaşlığı təşviq edir.
Tədbirdə Türkiyədən iki dəyərli qonaq – tanınmış vəkil Sahra Düzgün Tucel və beynəlxalq mediator Deniz Kite spiker qismində çıxış edərək, qadın hüquqları, mediatorluğun inkişafı və Azərbaycan-Türkiyə hüquqi əlaqələri sahəsində fikir və təcrübələrini bölüşdülər.
Forumun sonunda mühüm qərar qəbul edildi – “Azərbaycan-Türkiyə Qadın Hüquqşünaslar Platforması” adlı yeni əməkdaşlıq təşəbbüsünün yaradılması. Bu platforma vasitəsilə iki ölkənin qadın hüquqşünasları arasında qarşılıqlı əlaqələrin qurulması, birgə tədbirlərin, konfransların təşkili və qanunvericiliyin müqayisəli təhlili nəzərdə tutulur.
“Lady Femida” forumu bir daha sübut etdi ki, qadın hüquqşünaslar cəmiyyətin hüquqi və sosial inkişafında mühüm rol oynayır və onların həmrəyliyi yeni təşəbbüslər üçün mühüm zəmin yaradır.
