25–26 avqust 2025-ci il tarixlərində Budapeştdə Macarıstan Mərkəzi Bankı (MNB), Asiya Maliyyə Əməkdaşlıq Assosiasiyası (AFCA) və Macarıstan Banklar Assosiasiyasının (HBA) birgə təşkilatçılığı ilə keçirilən AFCA Maliyyə Sammit Forumunda Azərbaycan Banklar Assosiasiyasının (ABA) prezidenti Zakir Nuriyev və icraçı direktoru Yunus Abdulov iştirak ediblər.
Nüfuzlu tədbirdə iştirak edənlər arasında Macarıstan Milli Bankının sədri cənab Mihály Varga, Macarıstan Banklar Assosiasiyasının (HBA) prezidenti cənab Radován Jelasity və baş katibi cənab Levente Kovács, Macarıstanın Xarici İşlər və Ticarət naziri cənab Péter Szijjártó, Energetika naziri cənab Csaba Lantos, Avropa Banklar Assosiasiyasının yüksək səviyyəli nümayəndələri, eləcə də Macarıstanın aparıcı banklarının rəhbərləri və nümayəndələri yer almışdır.
Çıxışlarda beynəlxalq maliyyə sektorunda yaşıl maliyyənin dayanıqlı iqtisadi inkişafa rolu və Avropa ilə Asiyada enerji sektorunun inkişafına göstərə biləcəyi dəstək xüsusi vurğulanıb.
Tədbirin əsas məqsədi yaşıl maliyyənin qitələrarası enerji əməkdaşlığının gücləndirilməsində istiqamətverici rolunu önə çəkmək, mövcud çağırışları və praktiki həll yollarını müzakirə etmək olub.
Sammit çərçivəsində Macarıstan Banklar Assosiasiyasının prezidenti cənab Radován Jelasity, baş katibi cənab Levente Kovács və Macarıstan Enerji naziri cənab Csaba Lantos tərəfindən ABA prezidenti Zakir Nuriyevə Türk Dövlətləri Banklar Assosiasiyaları Şurasındakı “Vitse-prezident” roluna və HBA ilə səmərəli əməkdaşlığına görə “The Golden Beehive” mükafatı təqdim olunub. Həmçinin İtaliya Bank, Sığorta və Maliyyə Federasiyasının (FeBAF) baş katibi cənab Pierfrancesco Gaggi və Çin Bankının (BOC) nümayəndəsi xanım Lijuan Zhang da mükafatla təltif ediliblər.
Qeyd edək ki, 2025-ci ildə Azərbaycan COP29-a ev sahibliyi etmiş və tədbir yüksək təşkilatçılığı ilə ESG prinsiplərinin maliyyə sektorunda tətbiqinin əhəmiyyətini ön plana çıxarmışdır. Azərbaycan Banklar Assosiasiyasının prezidenti Zakir Nuriyev çıxışında bank sektorunun dayanıqlı inkişafa dəstək strategiyasını təqdim etmiş, xüsusilə “yaşıl və dayanıqlı bankçılıq”, “iqlim risklərinin inteqrasiyası”, “ESG şəffaflığı”, “əməkdaşlıq” və “innovasiyalara dəstək” kimi prinsipləri vurğulamışdır. Sektor 2030-cu ilə qədər dayanıqlı layihələrə 2 milyard manat ayırmağı planlaşdırır, hazırda isə bu məbləğin 330 milyon manatı maliyyələşdirilmişdir (ümumi öhdəliyin 16,5%-i).
Bununla yanaşı, Mərkəzi Bank 2023–2026-cı illəri əhatə edən “Dayanıqlı Maliyyə Yol Xəritəsi”ni qəbul etmiş və maliyyə institutlarında ESG və iqlim risklərinə dayanıqlılığı artırmağı hədəfləmişdir. 2025-ci ilin aprelində qəbul olunmuş “Dayanıqlı Maliyyə Prinsipləri” bankları yeni korporativ idarəetmə, hesabat və risk yanaşmalarına yönəldir. “Taksonomiya” sənədi isə yaşıl maliyyələşmənin əsas istiqamətlərini müəyyən edərək ictimaiyyətə təqdim edilmişdir.
