“Həkim məsləhəti” rubrikasında Mərkəzi Gömrük Hospitalının Fizioterapiya şöbəsinin rəisi, fizioterapevt-reabilitoloq Səidə Kərimova “Artrozun fizioterapevtik müalicəsi” mövsuzunda ətraflı məlumat verib. 

Artroz (osteoartrit) — oynaqlarımızın “yaşlanması” və zədələnməsi ilə gedən, zamanla inkişaf edən, həyat keyfiyyətimizi azalda bilən yayılmış bir xəstəlikdir. Bu zaman oynaq qığırdaqları incəlir, sümük səthləri bir-birinə sürtünməyə başlayır və nəticədə ağrı, hərəkət məhdudluğu, bəzən də iltihab yaranır. Ən çox diz, omba, boyun və bel oynaqları zərər görür.

Müalicədə məqsəd ağrını azaltmaq, hərəkəti bərpa etmək və xəstəliyin irəliləməsinin qarşısını almaqdır. Burada fizioterapiya çox önəmli rol oynayır — çünki dərmansız və təhlükəsiz üsullarla oynaqların vəziyyətini yaxşılaşdırır.

Fizioterapiya nədir və necə kömək edir?

Fizioterapiya — bədən funksiyalarını dərman istifadə etmədən, xüsusi tibbi cihazlar, məşqlər və metodlarla bərpa edən sahədir. Artrozda fizioterapiya:

Ağrını azaldır

İltihabı aradan qaldırır

Qan dövranını gücləndirir

Əzələlərin gücünü və tonusunu bərpa edir

Oynağın hərəkət imkanlarını artırır

Mərkəzi Gömrük Hospitalında Artroz üçün tətbiq olunan əsas fizioterapiya üsulları:

Maqnitoterapiya – maqnit sahəsi oynaqların dərin qatlarına təsir edərək ağrını və şişkinliyi azaldır.

Lazer terapiyası – zədələnmiş toxumaların bərpa prosesini sürətləndirir, qan dövranını yaxşılaşdırır.

Zərbə dalğa terapiyası (Shock Wave) – xroniki ağrı və iltihabın azaldılmasında, toxuma regenerasiyasının stimullaşdırılmasında təsirlidir.

Laser LLT (Low Level Laser Therapy) – aşağı intensivlikli lazer şüası ilə hüceyrələrin bərpasını stimullaşdırır, ağrını azaldır.

Ultrasəs terapiyası – iltihabı azaldır, oynaq mayesinin bərpasına kömək edir.

Elektroterapiya – sinir uclarına təsir edərək ağrını azaldır, əzələ gücünü artırır.

Müalicəvi idman və manual terapiya – hərəkəti artırır, əzələ balansını bərpa edir, ümumi vəziyyəti yaxşılaşdırır.

Evdə nələrə diqqət etməli?

Fizioterapiya seansları ilə yanaşı, gündəlik həyatınızda da bir neçə sadə qaydaya əməl etməyiniz müalicənin effektini artırar:

Aşırı çəkidən uzaq durun – artıq kilo oynaqlara yük gətirir.

Düzgün qidalanın – qığırdaq sağlamlığını dəstəkləyən zülal, omeqa-3 yağ turşuları, vitamin və minerallarla zəngin qidalar yeyin.

Hərəkətdə qalın – həkiminiz tərəfindən tövsiyə edilən yüngül məşqləri davamlı edin.

Soyuqdan və zərbədən qorunun – oynaq sağlamlığını qorumaq üçün bu vacibdir.

Fizioterapiya hər xəstə üçün fərdi plan tələb edir. Prosedurlara başlamaq üçün əvvəlcə mütəxəssis məsləhəti almaq lazımdır.

Səhhətinizə diqqət edin, hərəkətdə qalın və sağlam yaşayın! 

Mərkəzi Gömrük Hospitalında tətbiq olunan müasir fizioterapiya üsulları ilə ağrısız, aktiv və sağlam həyata addım atmaq mümkündür.