Demək olar ki, hər bir internet istifadəçisi ən azı bir dəfə gələnlər qutusunda şübhəli məktublarla qarşılaşıb ki, bu məktublarda banklardan gələn saxta bildirişlər, şirnikləndirici təkliflər və ya qorxulu xəbərdarlıqlar yer alıb. Bu gün fırıldaqçılar getdikcə daha peşəkar davranırlar: mesajlarını rəsmi yazışmalar kimi gizlədir, məşhur brendlərin dizaynını kopyalayır və psixoloji təzyiqdən istifadə edərək insanı məktubdakı qoşmanı açmağa və ya linkə keçid etməyə məcbur edirlər. 

Xüsusilə xatırlamaq lazımdır ki, bu cür elektron məktublar təkcə şəxsi ünvanlara deyil, həm də iş ünvanlarına gələ bilər. Bu halda risk artır, çünki fırıldaqçılar konfidensial şirkət məlumatlarına giriş əldə etməyə cəhd edə və ya korporativ sistemlərə hücum etmək üçün yoluxmuş əlavələrdən istifadə edə bilərlər. Buna görə də sayıqlıq və kibergigiyena təkcə evdə deyil, işdə də vacibdir.

"Fırıldaqçılar tez-tez sosial mühəndislik üsullarından istifadə edir, istifadəçiləri onlara pul və məlumat vermək üçün aldatmaq məqsədilə inandırıcı fəndlər tapırlar. Fişinq və fırıldaq sxemlərinin qurbanı olmamaq üçün hər hansı qorxulu bildiriş və ya səxavətli təkliflərə, xüsusilə də təcili tədbirlər tələb edən bildirişlərə tənqidi yanaşmaq vacibdir. Göndərənin ünvanını və əlaqə məlumatlarını diqqətlə yoxlayın. Əgər məktubda link varsa, kursoru üzərinə gətirərək gizlədilmiş ünvanın görünən ünvanla eyni olduğuna əmin olun. Səhvlərə və yazı xətalarına qarşı diqqətli olun. Ən əsası isə təhlükəli linkləri vaxtında bloklayan etibarlı həllərdən istifadə edin”, - deyə Kaspersky-nin spam analitiki Anna Lazarçeva bildirir.

"Azərbaycanda biz həmçinin fişinq e-poçtlarının və e-poçtlara zərərli əlavələrin sayının artmasını müşahidə edirik. Kibercinayətkarlar tez-tez hücumlarını yerli reallıqlara uyğunlaşdırırlar - onlar tanış loqolardan, populyar xidmətlərdən istifadə edir və hətta mətnləri Azərbaycan dilinə tərcümə edirlər. Buna görə də istifadəçilərin rəqəmsal savadlılığını artırmaq və onlara əsas kibertəhlükəsizlik qaydalarını xatırlatmaq xüsusilə vacibdir", - deyə Kaspersky-nin Azərbaycandakı rəsmi nümayəndəsi Müşviq Məmmədov öz növbəsində qeyd edir.

Kaspersky mütəxəssisləri fırıldaqçılığı göstərə biləcək aşağıdakı əlamətlərə diqqət etməyi tövsiyə edirlər:

⦁ Məktubu göndərənin şübhəli ünvanı və ya rəy üçün şübhəli əlaqə məlumatı.

⦁ Çox cazibədar təkliflər - uduşlar, bonuslar və asan qazanc.

⦁ Təcili tədbirlər görmək üçün tələblər – linkə keçid etmək, qoşmanı açmaq, pul köçürmək, nömrəyə zəng etmək.

⦁ Mətndə səhvlər və vizual dizaynın rəsmi brend üslubuna uyğunsuzluğu.

⦁ Məxfi məlumatların – loginlər, şifrələr, ödəniş məlumatılarının ötürülməsi üçün sorğular.

Şübhəli məktublarla etməli:

⦁ Qoşmaları açmayın və ya linklərə keçid etməyin.

⦁ Şübhəli mesajları silin və ya onları “Spam” qovluğuna yerləşdirin.

⦁ Fişinq saytlarını və zərərli qoşmaları bloklayan müasir təhlükəsizlik həllərindən istifadə edin.