Dördüncü Sənaye İnqilabının Təhlili və Koordinasiya Mərkəzinin (4SİM) ev sahibliyi ilə keçirilən “Sənaye 4.0 Forumu” çərçivəsində Azərbaycan Banklar Assosiasiyası (ABA) da iştirak edib.
Forum çərçivəsində “Sənaye 4.0 Hazırlıq Proqramı”nın pilot mərhələsinin nəticələri təqdim olunub, eləcə də Sənaye 4.0 Mərkəzinin gələcək fəaliyyəti ilə bağlı fikir mübadiləsi aparılıb.
Tədbirin əsas hissəsində Azərbaycan Banklar Assosiasiyası (ABA) prezidenti Zakir Nuriyev, Dördüncü Sənaye İnqilabının Təhlili və Koordinasiya Mərkəzi (4SİM) icraçı direktoru Fariz Cəfərov və Azərbaycan Biznesinin İnkişafı Fondu (ABİF) sədri Osman Xaliyev arasında Sənaye 4.0 texnologiyalarının tətbiqi və inkişafı istiqamətində strateji tərəfdaşlığa dair memorandum imzalanıb.
Memorandum sənaye və enerji sektorunda ağıllı istehsal, süni intellekt, avtomatlaşdırma və digər innovativ həllərin tətbiqini dəstəkləməyi, həmçinin texnologiya ekosisteminin inkişafına töhfə verməyi nəzərdə tutur.
