İyulun 4-də «Azərbaycan Respublikasının 2024-cü il dövlət büdcəsinin icrası haqqında» Azərbaycan Respublikasının Qanunu Milli Məclisdə qəbul edilib.

2024-cü ildə dövlət büdcəsinin gəlirləri 36388,0 mln. manat proqnoza qarşı 37161,8 mln. manat və ya 102,1 faiz icra, dövlət büdcəsinin xərcləri 39742,3 mln. manat proqnoza qarşı 37713,6 mln. manat və ya 94,9 faiz icra edilib.

Strukturuna görə 2024-cü il dövlət büdcəsi xərclərinin 21343,4 mln. manatı və ya 56,6 faizi cari xərclərə, 15074,6 mln. manatı və ya 40,0 faizi əsaslı xərclərə, 1295,6 mln. manatı və ya 3,4 faizi dövlət borcuna və öhdəliklərinə xidmətlə bağlı xərclərə yönəldilib.

2024-cü il dövlət büdcəsinin kəsiri 551,8 mln. Manat təşkil edib ki, bu da proqnozlaşdırılan kəsrdən 2802,5 mln. manat az olmuşdur.

2024-cü ilin sonuna vahid xəzinə hesabının sərbəst qalığı 1837,8 mln. manat təşkil edib.