11-12 dekabr 2024-cü il tarixlərində “Bakı Fond Birjası”nın (BFB) nümayəndə heyəti Abu Dabidə baş tutmuş Yaxın Şərq İnvestorlarla Əlaqələr Assosiasiyasının (MEİRA) tədbirində iştirak edib.

Yaxın Şərq İnvestorlarla Əlaqələr Assosiasiyası (MEIRA) investor münasibətlərini Yaxın Şərqdə ən yaxşı şəkildə təşviq edən qeyri-kommersiya təşkilatıdır. Hər il təşkil olunan bu tədbirdə regionda listinqdə olan emitentlər, beynəlxalq şirkətlər və dünyanın aparıcı fond birjalarının rəhbər nümayəndələri, investorlar, analitiklər və regionun tənzimləyici orqanlarının nümayəndələri bir araya toplanır. Abu Dabi Fond Birjasının (ADX) tərəfdaşlığı ilə baş tutan tədbirdə investor münasibətləri istiqamətində ən son tendensiyalar, regional kapital bazarlarının təcrübə və imkanları, fərdi investorlarla davamlı münasibətlərin yaradılması, inkişaf edən bazarlarda investorların inamının artırılması kimi mövzular müzakirə edilib.

Tədbirdə iştirakla bərabər Bakı Fond Birjasının nümayəndə heyəti Abu Dabi Fond Birjasının nümayəndə heyəti ilə görüşərək ölkələrin kapital bazarlarının inkişaf perspektivləri, fond bazarları arasında təcrübə mübadiləsi və qarşılıqlı əməkdaşlığın istiqamətləri haqda müzakirələr aparıb.

Xatırladaq ki, MEİRA konfransının əsas məqsədi maraqlı tərəflərlə investor münasibətləri, şəffaflıq və korporativ idarəetmənin əhəmiyyəti haqqında maarifləndirmə, bazar problemləri və ən qabaqcıl təcrübələr ətrafında dialoqu təşviq etməkdir.