Mərkəzi Bank ilə ADA Universitetinin İxtisasartırma Proqramının əməkdaşlığı çərçivəsində keçirilən “Liderlik səriştələri” üzrə təlim proqramının bağlanış mərasimi təşkil olunub.
Tədbirdə çıxış edən Mərkəzi Bankın sədr müavini Gülər Paşayeva ADA Universiteti ilə əməkdaşlıq çərçivəsində təşkil olunan bu növ təlimlərin ölkədə insan kapitalının inkişafında və liderlərin yetişdirilməsində mühüm rol oynadığını vurğulayıb. O, bu təlim proqramı ərzində idarəetmə sahəsində qazanılmış müasir səriştə və bacarıqların təşkilatın ümumi uğuruna töhfə verəcəyini qeyd edib.
Mərkəzi Bankın sədr müavini Vüsal Xəlilov təlimin əhəmiyyətindən danışarkən əldə olunmuş yeni bacarıqların tətbiqinin ölkə üçün dəyər yaradacağına dair əminliyini bildirib.
Mərkəzi Bankın sədr müavini Toğrul Əliyev bu inkişaf proqramının həm şəxsi, həm də peşəkar müstəvidə mühüm rol oynayacağını qeyd edib və iştirakçılara uğurlar arzulayıb.
ADA Universitetinin Akademik işlər üzrə prorektoru Dr. Elkin Nurməmmədov təlimlərin komanda ruhunu gücləndirdiyini bildirib. O, təlimin iştirakçılara çevik qərarvermə və effektiv idarəetmə bacarıqları qazandırmaqla onların peşəkar inkişafında mühüm rol oynayacağına dair əminliyini ifadə edib.
ADA Universitetinin akademik işlər üzrə prorektorunun müşaviri və İxtisasartırma proqramının rəhbəri Aygün Hacıyeva öz çıxışında proqramın peşəkar inkişaf baxımından mühüm əhəmiyyət kəsb etdiyini vurğulayıb və iştirakçılara gələcək fəaliyyətlərində uğurlar arzulayıb.
Bağlanış mərasiminin sonunda iştirakçılara sertifikatlar təqdim edilib və xatirə fotosu çəkilib.
Qeyd edək ki, ötən ilin sentyabr ayından başlamış proqramda Mərkəzi Bankın 119 nəfər rəhbər şəxsi iştirak edib. 9 moduldan ibarət bu proqramın əsas məqsədi iştirakçıların peşəkar potensiallarının gücləndirilməsinə və bacarıqlarının daha da təkmilləşdirilməsinə töhfə vermək olub. İştirakçılar peşəkar təlimçilər tərəfindən müasir dövrün trendlərinə uyğun mövzuların əhatə olunduğu proqram çərçivəsində interaktiv təlimlərə qatılıb.
