Vətəndaş məmnunluğu və kommunikasiya vasitələrinin əlçatanlığına xüsusi önəm verən Mərkəzi Bank, müraciət kanallarının səmərəli fəaliyyətini daim diqqətdə saxlayır. Cari ilin aprel ayından etibarən müraciətlərin operativ qaydada qəbulu və cavablandırılması məqsədilə "myGov" platforması vasitəsilə Mərkəzi Banka elektron müraciətlərin göndərilməsi təşkil olunub.

Növbəti yenilik isə vətəndaşların "myGov" platformasına inteqrasiya olunmuş onlayn növbə sistemi vasitəsilə Mərkəzi Banka gəlmədən növbə əldə etmək imkanının yaradılmasıdır. Belə ki, vətəndaş tərəfindən sistemin “Yeni rezervasiya” bölməsinə Mərkəzi Banka gələcəyi tarix, zaman və əlaqə nömrəsi daxil edilir. Vətəndaş təyin olunmuş qəbul tarixi və saatında Mərkəzi Bankda aidiyyəti üzrə “Qəbul otağı”na gələrək öncədən əldə etdiyi SMS təsdiq kodunu növbəlilik sisteminə daxil edir və sistem tərəfindən ona sıra nömrəsi təqdim olunur. Həmin sıra nömrəsinə uyğun olaraq Mərkəzi Bankın məsul əməkdaşı ilə görüş təmin olunur.

Vətəndaş həmçinin "myGov" platforması vasitəsilə əldə olunmuş onlayn növbəni “Rezervasiyanın ləğvi” bölməsi vasitəsilə ləğv edə bilər.