Mərkəzi Gömrük Hospitalının Mama-ginekologiya şöbəsinin mama-ginekoloqu, t.ü.f.d. Dr. Sədi Allahverdiyev 24-26 aprel 2025-ci il tarixlərində Çexiya Respublikasının paytaxtı Praqa şəhərində keçirilən XXI Beynəlxalq konqresdə “Uşaqlıq miomalarının cərrahi müalicəsi sonrası hamiləlik nəticələri” mövzusunda təqdimatla çıxış edib. Uşaqlıq və Endometrioz üzrə Avropa Cəmiyyətinin təşkilatçılığı ilə baş tutmuş tədünya üzrə tanınmış mütəxəssislərin iştirak etdiyi mühüm elmi platforma kimi diqqət çəkib.
Dr. Sədi Allahverdiyev çıxışında uşaqlıq miomalarının müxtəlif lokalizasiya və ölçülərinin hamiləlik zamanı törətdiyi dəyişikliklər, miomaların hamiləlik nəticələrinə mənfi təsirləri, cərrahi müdaxilə zərurəti və əməliyyatdan sonrakı dövrdə hamiləliyin gedişi ilə bağlı aktual elmi bilgiləri iştirakçılarla bölüşüb. O, klinik təcrübələrə və müasir elmi araşdırmalara əsaslanaraq, bu sahədə düzgün tibbi yanaşmanın əhəmiyyətini vurğulayıb.
Sessiya böyük maraqla qarşılanmış və təqdimatın sonunda 30 dəqiqə davam edən aktiv diskussiya zamanı iştirakçıların sualları ətraflı cavablandırılıb. Müzakirə zamanı doğuş sonrası reproduktiv nəticələr, cərrahiyyənin riskləri və doğuş planlaşdırması məsələləri ön plana çıxarılıb. Tədbirdə Mərkəzi Gömrük Hospitalının digər nümayəndəsi, mama-ginekoloq, t.ü.f.d.Dr. Mehriban Əmirova iştirakçı qismində iştirak edib.
Konqresin xüsusi bölməsi olan Azərbaycan - İsrail Müştərək Milli Sessiyası Uşaqlıq və Endometrioz üzrə Avropa Cəmiyyətinin Prezidenti, professor Francisco Carmona və XXI Beynəlxalq konqresin Prezidenti, tanınmış çexiyalı ginekoloq Dr.Lubomir Mikulasek tərəfindən yüksək qiymətləndirilib. Onlar Azərbaycan nümayəndə heyətinin elmi hazırlığını, klinik yanaşmalarını və beynəlxalq əməkdaşlığa verdiyi töhfəni xüsusi vurğulayıblar.
